।।ଶ୍ରୀଗୁରୁଗୀତା ।। (ଲଘୁ )
🔴 ।।ଶ୍ରୀଗୁରୁଗୀତା ।। (ଲଘୁ ) 🔴
ଶ୍ରୀଗଣେଶାୟ ନମଃ ।
ଶ୍ରୀଗୁରୁଭ୍ୟୋ ନମଃ ।
ଅସ୍ୟ ଶ୍ରୀ ଗୁରୁଗୀତା ସ୍ତୋତ୍ରମନ୍ତ୍ରସ୍ୟ ।
ଭଗଵାନ୍ ସଦାଶିଵ ଋଷିଃ ।
ନାନାଵିଧାନି ଛନ୍ଦାଂସି ।
ଶ୍ରୀ ଗୁରୁପରମାତ୍ମା ଦେଵତା ।
ହଂ ବୀଜମ୍ । ସଃ ଶକ୍ତିଃ । କ୍ରୋଂ କୀଲକମ୍ ।
ଶ୍ରୀ ଗୁରୁପ୍ରସାଦସିଦ୍ଧ୍ୟର୍ଥେ ଜପେ ଵିନିୟୋଗଃ ॥
🟣॥ ଅଥ ଧ୍ୟାନମ୍ ॥🟣
ହଂସାଭ୍ୟାଂ ପରିଵୃତ୍ତପତ୍ରକମଲୈ-
ର୍ଦିଵ୍ୟୈର୍ଜଗତ୍କାରଣୈ-
ର୍ଵିଶ୍ଵୋତ୍କୀର୍ଣମନେକଦେହନିଲୟୈଃ
ସ୍ଵଚ୍ଛନ୍ଦମାତ୍ମେଚ୍ଛୟା ।
ତଦ୍ଦ୍ୟୋତଂ ପଦଶାଂଭଵଂ ତୁ ଚରଣଂ
ଦୀପାଙ୍କୁରଗ୍ରାହିଣଂ
ପ୍ରତ୍ୟକ୍ଷାକ୍ଷରଵିଗ୍ରହଂ ଗୁରୁପଦଂ
ଧ୍ୟାୟେଦ୍ଵିଭୁଂ ଶାଶ୍ଵତମ୍ ॥
ମମ ଚତୁର୍ଵିଧପୁରୁଷାର୍ଥସିଦ୍ଧ୍ୟର୍ଥେ ଜପେ ଵିନିୟୋଗଃ ।
🔴॥ ଅଥ ଶ୍ରୀଗୁରୁଗୀତା ॥🔴
ସୂତ ଉଵାଚ -
କୈଲାସ ଶିଖରେ ରମ୍ୟେ ଭକ୍ତିସନ୍ଧାନନାୟକମ୍ ।
ପ୍ରଣମ୍ୟ ପାର୍ଵତୀ ଭକ୍ତ୍ୟା ଶଙ୍କରଂ ପର୍ୟପୃଚ୍ଛତ ॥ ୧॥
ଶ୍ରୀ ଦେଵ୍ୟୁଵାଚ -
ଓଁ ନମୋ ଦେଵଦେଵେଶ ପରାତ୍ପରଜଗଦ୍ଗୁରୋ ।
ସଦାଶିଵ ମହାଦେଵ ଗୁରୁଦୀକ୍ଷାଂ ପ୍ରଦେହି ମେ ॥ ୨॥
କେନ ମାର୍ଗେଣ ଭୋ ସ୍ଵାମିନ୍ ଦେହି ବ୍ରହ୍ମମୟୋ ଭଵେତ୍ ।
ତ୍ଵଂ କୃପାଂ କୁରୁ ମେ ସ୍ଵାମିନ୍ ନମାମି ଚରଣୌ ତଵ ॥ ୩॥
ଈଶ୍ଵର ଉଵାଚ -
ମମରୂପାସି ଦେଵି ତ୍ଵଂ ତ୍ଵତ୍ପ୍ରୀତ୍ୟର୍ଥଂ ଵଦାମ୍ୟହମ୍ ।
ଲୋକୋପକାରକଃ ପ୍ରଶ୍ନୋ ନ କେନାପି କୃତଃ ପୁରା ॥ ୪॥
ଦୁର୍ଲଭଂ ତ୍ରିଷୁ ଲୋକେଷୁ ତଚ୍ଛୃଣୁଷ୍ଵ ଵଦାମ୍ୟହମ୍ ।
ଗୁରୁଂ ଵିନା ବ୍ରହ୍ମ ନାନ୍ୟତ୍ସତ୍ୟଂ ସତ୍ୟଂ ଵରାନନେ ॥ ୫॥
ଵେଦଶାସ୍ତ୍ରପୁରାଣାନି ଇତିହାସାଦିକାନି ଚ ।
ମନ୍ତ୍ରୟନ୍ତ୍ରାଦିଵିଦ୍ୟାଶ୍ଚ ସ୍ମୃତିରୁଚ୍ଚାଟନାଦିକମ୍ ॥ ୬॥
ଶୈଵଶାକ୍ତାଗମାଦୀନି ଅନ୍ୟାନି ଵିଵିଧାନି ଚ ।
ଅପଭ୍ରଂଶକରାଣୀହ ଜୀଵାନାଂ ଭ୍ରାନ୍ତଚେତସାମ୍ ॥ ୭॥
ୟଜ୍ଞୋ ଵ୍ରତଂ ତପୋ ଦାନଂ ଜପସ୍ତୀର୍ଥଂ ତଥୈଵ ଚ ।
ଗୁରୁତତ୍ତ୍ଵମଵିଜ୍ଞାୟ ମୂଢାସ୍ତେ ଚରତେ ଜନାଃ ॥ ୮॥
ଗୁରୁର୍ବୁଦ୍ଧ୍ୟାତ୍ମନୋ ନାନ୍ୟତ୍ ସତ୍ୟଂ ସତ୍ୟଂ ନ ସଂଶୟଃ ।
ତଲ୍ଲାଭାର୍ଥଂ ପ୍ରୟତ୍ନସ୍ତୁ କର୍ତଵ୍ୟୋ ହି ମନୀଷିଭିଃ ॥ ୯॥
ଗୂଢ ଵିଦ୍ୟା ଜଗନ୍ମାୟା ଦେହେ ଚାଜ୍ଞାନସଂଭଵା ।
ଉଦୟୋ ୟତ୍ପ୍ରକାଶେନ ଗୁରୁଶବ୍ଦେନ କଥ୍ୟତେ ॥ ୧୦॥
ସର୍ଵପାପଵିଶୁଦ୍ଧାତ୍ମା ଶ୍ରୀଗୁରୋଃ ପାଦସେଵନାତ୍ ।
ଦେହୀ ବ୍ରହ୍ମ ଭଵେଦ୍ୟସ୍ମାତ୍ତ୍ଵତ୍କୃପାର୍ଥଂ ଵଦାମି ତେ ॥ ୧୧॥
ଗୁରୁପାଦାଂବୁଜଂ ସ୍ମୃତ୍ଵା ଜଲଂ ଶିରସି ଧାରୟେତ୍ ।
ସର୍ଵତୀର୍ଥାଵଗାହସ୍ୟ ସମ୍ପ୍ରାପ୍ନୋତି ଫଲଂ ନରଃ ॥ ୧୨॥
ଶୋଷଣଂ ପାପପଙ୍କସ୍ୟ ଦୀପନଂ ଜ୍ଞାନତେଜସାମ୍ ।
ଗୁରୁପାଦୋଦକଂ ସମ୍ୟକ୍ ସଂସାରାର୍ଣଵତାରକମ୍ ॥ ୧୩॥
ଅଜ୍ଞାନମୂଲହରଣଂ ଜନ୍ମ କର୍ମ ନିଵାରଣମ୍ ।
ଜ୍ଞାନଵୈରାଗ୍ୟସିଦ୍ଧ୍ୟର୍ଥଂ ଗୁରୁପାଦୋଦକଂ ପିବେତ୍ ॥ ୧୪॥
ଗୁରୋଃ ପାଦୋଦକଂ ପୀତ୍ଵା ଗୁରୋରୁଚ୍ଛିଷ୍ଟଭୋଜନମ୍ ।
ଗୁରୁମୂର୍ତେଃ ସଦା ଧ୍ୟାନଂ ଗୁରୁମନ୍ତ୍ରଂ ସଦା ଜପେତ୍ ॥ ୧୫॥
କାଶୀ କ୍ଷେତ୍ରଂ ତନ୍ନିଵାସୋ ଜାହ୍ନଵୀ ଚରଣୋଦକମ୍ ।
ଗୁରୁର୍ଵିଶ୍ଵେଶ୍ଵରଃ ସାକ୍ଷାତ୍ ତାରକଂ ବ୍ରହ୍ମ ନିଶ୍ଚିତମ୍ ॥ ୧୬॥
ଗୁରୋଃ ପାଦୋଦକଂ ୟତ୍ତୁ ଗୟାଽସୌ ସୋଽକ୍ଷୟୋ ଵଟଃ ।
ତୀର୍ଥରାଜଃ ପ୍ରୟାଗଶ୍ଚ ଗୁରୁମୂର୍ତ୍ୟୈ ନମୋ ନମଃ ॥ ୧୭॥
ଗୁରୁମୂର୍ତିଂ ସ୍ମରେନ୍ନିତ୍ୟଂ ଗୁରୁନାମ ସଦା ଜପେତ୍ ।
ଗୁରୋରାଜ୍ଞାଂ ପ୍ରକୁର୍ଵୀତ ଗୁରୋରନ୍ୟନ୍ନ ଭାଵୟେତ୍ ॥ ୧୮॥
ଗୁରୁଵକ୍ତ୍ରସ୍ଥିତଂ ବ୍ରହ୍ମ ପ୍ରାପ୍ୟତେ ତତ୍ପ୍ରସାଦତଃ ।
ଗୁରୋର୍ଧ୍ୟାନଂ ସଦା କୁର୍ୟାତ୍କୁଲସ୍ତ୍ରୀ ସ୍ଵପତେର୍ୟଥା ॥ ୧୯॥
ସ୍ଵାଶ୍ରମଂ ଚ ସ୍ଵଜାତିଂ ଚ ସ୍ଵକୀର୍ତିପୁଷ୍ଟିଵର୍ଧନମ୍ ।
ଏତତ୍ସର୍ଵଂ ପରିତ୍ୟଜ୍ୟ ଗୁରୋରନ୍ୟନ୍ନ ଭାଵୟେତ୍ ॥ ୨୦॥
ଅନନ୍ୟାଶ୍ଚିନ୍ତୟନ୍ତୋ ମାଂ ସୁଲଭଂ ପରମଂ ପଦମ୍ ।
ତସ୍ମାତ୍ ସର୍ଵପ୍ରୟତ୍ନେନ ଗୁରୋରାରାଧନଂ କୁରୁ ॥ ୨୧॥
ତ୍ରୈଲୋକ୍ୟେ ସ୍ଫୁଟଵକ୍ତାରୋ ଦେଵାଦ୍ୟସୁରପନ୍ନଗାଃ ।
ଗୁରୁଵକ୍ତ୍ରସ୍ଥିତା ଵିଦ୍ୟା ଗୁରୁଭକ୍ତ୍ୟା ତୁ ଲଭ୍ୟତେ ॥ ୨୨॥
ଗୁକାରସ୍ତ୍ଵନ୍ଧକାରଶ୍ଚ ରୁକାରସ୍ତେଜ ଉଚ୍ୟତେ ।
ଅଜ୍ଞାନଗ୍ରାସକଂ ବ୍ରହ୍ମ ଗୁରୁରେଵ ନ ସଂଶୟଃ ॥ ୨୩॥
ଗୁକାରଃ ପ୍ରଥମୋ ଵର୍ଣୋ ମାୟାଦିଗୁଣଭାସକଃ ।
ରୁକାରୋ ଦ୍ଵିତୀୟୋ ବ୍ରହ୍ମ ମାୟା ଭ୍ରାନ୍ତି ଵିନାଶନମ୍ ॥ ୨୪॥
ଏଵଂ ଗୁରୁପଦଂ ଶ୍ରେଷ୍ଠଂ ଦେଵାନାମପି ଦୁର୍ଲଭମ୍ ।
ହାହା ହୂହୂ ଗଣୈଶ୍ଚୈଵ ଗନ୍ଧର୍ଵୈଶ୍ଚ ପ୍ରପୂଜ୍ୟତେ ॥ ୨୫॥
ଧ୍ରୁଵଂ ତେଷାଂ ଚ ସର୍ଵେଷାଂ ନାସ୍ତି ତତ୍ତ୍ଵଂ ଗୁରୋଃ ପରମ୍ ।
ଆସନଂ ଶୟନଂ ଵସ୍ତ୍ରଂ ଭୂଷଣଂ ଵାହନାଦିକମ୍ ॥ ୨୬॥
ସାଧକେନ ପ୍ରଦାତଵ୍ୟଂ ଗୁରୁସଂତୋଷକାରକମ୍ ।
ଗୁରୋରାରାଧନଂ କାର୍ୟଂ ସ୍ଵଜୀଵିତ୍ଵଂ ନିଵେଦୟେତ୍ ॥ ୨୭॥
କର୍ମଣା ମନସା ଵାଚା ନିତ୍ୟମାରାଧୟେଦ୍ଗୁରୁମ୍ ।
ଦୀର୍ଘଦଣ୍ଡଂ ନମସ୍କୃତ୍ୟ ନିର୍ଲଜ୍ଜୋ ଗୁରୁସନ୍ନିଧୌ ॥ ୨୮॥
ଶରୀରମିନ୍ଦ୍ରିୟଂ ପ୍ରାଣାଂ ସଦ୍ଗୁରୁଭ୍ୟୋ ନିଵେଦୟେତ୍ ।
ଆତ୍ମଦାରାଦିକଂ ସର୍ଵଂ ସଦ୍ଗୁରୁଭ୍ୟୋ ନିଵେଦୟେତ୍ ॥ ୨୯॥
କୃମିକୀଟଭସ୍ମଵିଷ୍ଠା ଦୁର୍ଗନ୍ଧିମଲମୂତ୍ରକମ୍ ।
ଶ୍ଲେଷ୍ମରକ୍ତଂ ତ୍ଵଚା ମାଂସଂ ଵଞ୍ଚୟେନ୍ନ ଵରାନନେ ॥ ୩୦॥
ସଂସାରଵୃକ୍ଷମାରୂଢାଃ ପତନ୍ତୋ ନରକାର୍ଣଵେ ।
ୟେନ ଚୈଵୋଦ୍ଧୃତାଃ ସର୍ଵେ ତସ୍ମୈ ଶ୍ରୀଗୁରଵେ ନମଃ ॥ ୩୧॥
ଗୁରୁର୍ବ୍ରହ୍ମା ଗୁରୁର୍ଵିଷ୍ଣୁର୍ଗୁରୁର୍ଦେଵୋ ମହେଶ୍ଵରଃ ।
ଗୁରୁରେଵ ପରବ୍ରହ୍ମ ତସ୍ମୈ ଶ୍ରୀଗୁରଵେ ନମଃ ॥ ୩୨॥
ହେତଵେ ଜଗତାମେଵ ସଂସାରାର୍ଣଵସେତଵେ ।
ପ୍ରଭଵେ ସର୍ଵଵିଦ୍ୟାନାଂ ଶମ୍ଭଵେ ଗୁରଵେ ନମଃ ॥ ୩୩॥
ଅଜ୍ଞାନତିମିରାନ୍ଧସ୍ୟ ଜ୍ଞାନାଞ୍ଜନଶଲାକୟା ।
ଚକ୍ଷୁରୁନ୍ମୀଲିତଂ ୟେନ ତସ୍ମୈ ଶ୍ରୀଗୁରଵେ ନମଃ ॥ ୩୪॥
ତ୍ଵଂ ପିତା ତ୍ଵଂ ଚ ମେ ମାତା ତ୍ଵଂ ବନ୍ଧୁସ୍ତ୍ଵଂ ଚ ଦେଵତା ।
ସଂସାରପ୍ରତିବୋଧାର୍ଥଂ ତସ୍ମୈ ଶ୍ରୀଗୁରଵେ ନମଃ ॥ ୩୫॥
ୟତ୍ସତ୍ୟେନ ଜଗତ୍ସତ୍ୟଂ ୟତ୍ପ୍ରକାଶେନ ଭାତି ତତ୍ ।
ୟଦାନନ୍ଦେନ ନନ୍ଦନ୍ତି ତସ୍ମୈ ଶ୍ରୀଗୁରଵେ ନମଃ ॥ ୩୬॥
ୟସ୍ୟ ସ୍ଥିତ୍ୟା ସତ୍ୟମିଦଂ ୟଦ୍ଭାତି ଭାନୁରୂପତଃ ।
ପ୍ରିୟଂ ପୁତ୍ରଦି ୟତ୍ପ୍ରୀତ୍ୟା ତସ୍ମୈ ଶ୍ରୀଗୁରଵେ ନମଃ ॥ ୩୭॥
ୟେନ ଚେତୟତେ ହୀଦଂ ଚିତ୍ତଂ ଚେତୟତେ ନ ୟମ୍ ।
ଜାଗ୍ରତ୍ସ୍ଵପ୍ନସୁଷୁପ୍ତ୍ୟାଦି ତସ୍ମୈ ଶ୍ରୀଗୁରଵେ ନମଃ ॥ ୩୮॥
ୟସ୍ୟ ଜ୍ଞାନାଦିଦଂ ଵିଶ୍ଵଂ ନ ଦୃଶ୍ୟଂ ଭିନ୍ନଭେଦତଃ ।
ସଦେକରୂପରୂପାୟ ତସ୍ମୈ ଶ୍ରୀଗୁରଵେ ନମଃ ॥ ୩୯॥
ୟସ୍ୟାମତଂ ତସ୍ୟ ମତଂ ମତଂ ୟସ୍ୟ ନ ଵେଦ ସଃ ।
ଅନନ୍ୟଭାଵ ଭାଵାୟ ତସ୍ମୈ ଶ୍ରୀଗୁରଵେ ନମଃ ॥ ୪୦॥
ୟସ୍ୟ କାରଣରୂପସ୍ୟ କାର୍ୟରୂପେଣ ଭାତି ୟତ୍ ।
କାର୍ୟକାରଣରୂପାୟ ତସ୍ମୈ ଶ୍ରୀଗୁରଵେ ନମଃ ॥ ୪୧॥
ନାନାରୂପମିଦଂ ସର୍ଵଂ ନ କେନାପ୍ୟସ୍ତି ଭିନ୍ନତା ।
କାର୍ୟକାରଣତା ଚୈଵ ତସ୍ମୈ ଶ୍ରୀଗୁରଵେ ନମଃ ॥ ୪୨॥
ୟଦଙ୍ଘ୍ରିକମଲଦ୍ଵନ୍ଦ୍ଵଂ ଦ୍ଵନ୍ଦ୍ଵତାପନିଵାରକମ୍ ।
ତାରକଂ ସର୍ଵଦାଽପଦ୍ଭ୍ୟଃ ଶ୍ରୀଗୁରୁଂ ପ୍ରଣମାମ୍ୟହମ୍ ॥ ୪୩॥
ଶିଵେ କ୍ରୁଦ୍ଧେ ଗୁରୁସ୍ତ୍ରାତା ଗୁରୌ କ୍ରୁଦ୍ଧେ ଶିଵୋ ନ ହି ।
ତସ୍ମାତ୍ ସର୍ଵପ୍ରୟତ୍ନେନ ଶ୍ରୀଗୁରୁଂ ଶରଣଂ ଵ୍ରଜେତ୍ ॥ ୪୪॥
ଵନ୍ଦେ ଗୁରୁପଦଦ୍ଵନ୍ଦ୍ଵଂ ଵାଙ୍ମନଶ୍ଚିତ୍ତଗୋଚରମ୍
ଶ୍ଵେତରକ୍ତପ୍ରଭାଭିନ୍ନଂ ଶିଵଶକ୍ତ୍ୟାତ୍ମକଂ ପରମ୍ ॥ ୪୫॥
ଗୁକାରଂ ଚ ଗୁଣାତୀତଂ ରୁକାରଂ ରୂପଵର୍ଜିତମ୍ ।
ଗୁଣାତୀତସ୍ଵରୂପଂ ଚ ୟୋ ଦଦ୍ୟାତ୍ସ ଗୁରୁଃ ସ୍ମୃତଃ ॥ ୪୬॥
ଅତ୍ରିନେତ୍ରଃ ସର୍ଵସାକ୍ଷୀ ଅଚତୁର୍ବାହୁରଚ୍ୟୁତଃ ।
ଅଚତୁର୍ଵଦନୋ ବ୍ରହ୍ମା ଶ୍ରୀଗୁରୁଃ କଥିତଃ ପ୍ରିୟେ ॥ ୪୭॥
ଅୟଂ ମୟାଞ୍ଜଲିର୍ବଦ୍ଧୋ ଦୟା ସାଗରଵୃଦ୍ଧୟେ ।
ୟଦନୁଗ୍ରହତୋ ଜନ୍ତୁଶ୍ଚିତ୍ରସଂସାରମୁକ୍ତିଭାକ୍ ॥ ୪୮॥
ଶ୍ରୀଗୁରୋଃ ପରମଂ ରୂପଂ ଵିଵେକଚକ୍ଷୁଷୋଽମୃତମ୍ ।
ମନ୍ଦଭାଗ୍ୟା ନ ପଶ୍ୟନ୍ତି ଅନ୍ଧାଃ ସୂର୍ୟୋଦୟଂ ୟଥା ॥ ୪୯॥
ଶ୍ରୀନାଥଚରଣଦ୍ଵନ୍ଦ୍ଵଂ ୟସ୍ୟାଂ ଦିଶି ଵିରାଜତେ ।
ତସ୍ୟୈ ଦିଶେ ନମସ୍କୁର୍ୟାଦ୍ ଭକ୍ତ୍ୟା ପ୍ରତିଦିନଂ ପ୍ରିୟେ ॥ ୫୦॥
ତସ୍ୟୈ ଦିଶେ ସତତମଞ୍ଜଲିରେଷ ଆର୍ୟେ
ପ୍ରକ୍ଷିପ୍ୟତେ ମୁଖରିତୋ ମଧୁପୈର୍ବୁଧୈଶ୍ଚ ।
ଜାଗର୍ତି ୟତ୍ର ଭଗଵାନ୍ଗୁରୁଚକ୍ରଵର୍ତୀ
ଵିଶ୍ଵୋଦୟ ପ୍ରଲୟନାଟକନିତ୍ୟସାକ୍ଷୀ ॥ ୫୧॥
ଶ୍ରୀନାଥାଦି ଗୁରୁତ୍ରୟଂ ଗଣପତିଂ ପୀଠତ୍ରୟଂ ଭୈରଵଂ
ସିଦ୍ଧୌଘଂ ବଟୁକତ୍ରୟଂ ପଦୟୁଗଂ ଦୂତୀକ୍ରମଂ ମଣ୍ଡଲମ୍ ।
ଵୀରାନ୍ଦ୍ଵ୍ୟଷ୍ଟଚତୁଷ୍କ ଷଷ୍ଟି ନଵକଂ ଵୀରାଵଲୀ ପଞ୍ଚକଂ
ଶ୍ରୀମନ୍ମାଲିନିମନ୍ତ୍ରରାଜସହିତଂ ଵନ୍ଦେ ଗୁରୋର୍ମଣ୍ଡଲମ୍ ॥ ୫୨॥
ଅଭ୍ୟସ୍ତୈଃ ସକଲୈଃ ସୁଦୀର୍ଘମନିଲୈର୍ଵ୍ୟାଧିପ୍ରଦୈର୍ଦୁଷ୍କରୈଃ
ପ୍ରାଣାୟାମଶତୈରନେକକରଣୈର୍ଦୁଃଖାତ୍ମକୈର୍ଦୁର୍ଜୟୈଃ ।
ୟସ୍ମିନ୍ନଭ୍ୟୁଦିତେ ଵିନଶ୍ୟତି ବଲୀ ଵାୟୁଃ ସ୍ଵୟଂ ତତ୍କ୍ଷଣାତ୍
ପ୍ରାପ୍ତୁଂ ତତ୍ସହଜଂ ସ୍ଵଭାଵମନିଶଂ ସେଵଧ୍ଵମେକଂ ଗୁରୁମ୍ ॥ ୫୩॥
ସ୍ଵଦେଶିକସ୍ୟୈଵ ଶରୀରଚିନ୍ତନଂ
ଭଵେଦନନ୍ତସ୍ୟ ଶିଵସ୍ୟ ଚିନ୍ତନମ୍ ।
ସ୍ଵଦେଶିକସ୍ୟୈଵ ଚ ନାମକୀର୍ତନଂ
ଭଵେଦନନ୍ତସ୍ୟ ଶିଵସ୍ୟ କୀର୍ତନମ୍ ॥ ୫୪॥
ୟତ୍ପାଦରେଣୁକଣିକା କାପି ସଂସାରଵାରିଧେଃ ।
ସେତୁବନ୍ଧାୟତେ ନାଥଂ ଦେଶିକଂ ତମୁପାସ୍ମହେ ॥ ୫୫॥
ୟସ୍ମାଦନୁଗ୍ରହଂ ଲବ୍ଧ୍ଵା ମହଦଜ୍ଞାନମୁତ୍ସୃଜେତ୍ ।
ତସ୍ମୈ ଶ୍ରୀଦେଶିକେନ୍ଦ୍ରାୟ ନମଶ୍ଚାଭୀଷ୍ଟସିଦ୍ଧୟେ ॥ ୫୬॥
ପାଦାବ୍ଜଂ ସର୍ଵସଂସାରଦାଵାନଲଵିନାଶକମ୍ ।
ବ୍ରହ୍ମରନ୍ଧ୍ରେ ସିତାମ୍ଭୋଜମଧ୍ୟସ୍ଥଂ ଚନ୍ଦ୍ରମଣ୍ଡଲେ ॥ ୫୭॥
ଅକଥାଦିତ୍ରିରେଖାବ୍ଜେ ସହସ୍ରଦଲମଣ୍ଡଲେ ।
ହଂସପାର୍ଶ୍ଵତ୍ରିକୋଣେ ଚ ସ୍ମରେତ୍ତନ୍ମଧ୍ୟଗଂ ଗୁରୁମ୍ ॥ ୫୮॥
ସକଲଭୁଵନସୃଷ୍ଟିଃ କଲ୍ପିତାଶେଷପୁଷ୍ଟିଃ
ନିଖିଲନିଗମଦୃଷ୍ଟିଃ ସମ୍ପଦାଂ ଵ୍ୟର୍ଥଦୃଷ୍ଟିଃ ।
ଅଵଗୁଣପରିମାର୍ଷ୍ଟିସ୍ତତ୍ପଦାର୍ଥୈକଦୃଷ୍ଟିଃ
ଭଵ ଗୁଣପରମେଷ୍ଟିର୍ମୋକ୍ଷମାର୍ଗୈକଦୃଷ୍ଟିଃ ॥ ୫୯॥
ସକଲଭୁଵନରଙ୍ଗସ୍ଥାପନା ସ୍ତମ୍ଭୟଷ୍ଟିଃ
ସକରୁଣରସଵୃଷ୍ଟିସ୍ତତ୍ତ୍ଵମାଲାସମଷ୍ଟିଃ ।
ସକଲସମୟସୃଷ୍ଟିଃ ସଚ୍ଚିଦାନନ୍ଦଦୃଷ୍ଟିର୍-
ନିଵସତୁ ମୟି ନିତ୍ୟଂ ଶ୍ରୀଗୁରୋର୍ଦିଵ୍ୟଦୃଷ୍ଟିଃ ॥ ୬୦॥
ଅଗ୍ନିଶୁଦ୍ଧସମଂ ତାତ ଜ୍ଵାଲା ପରିଚକାଧିୟା ।
ମନ୍ତ୍ରରାଜମିମଂ ମନ୍ୟେଽହର୍ନିଶଂ ପାତୁ ମୃତ୍ୟୁତଃ ॥ ୬୧॥
ତଦେଜତି ତନ୍ନୈଜତି ତଦ୍ଦୂରେ ତତ୍ସମୀପକେ ।
ତଦନ୍ତରସ୍ୟ ସର୍ଵସ୍ୟ ତଦୁ ସର୍ଵସ୍ୟ ବାହ୍ୟତଃ ॥ ୬୨॥
ଅଜୋଽହମଜରୋଽହଂ ଚ ଅନାଦିନିଧନଃ ସ୍ଵୟମ୍ ।
ଅଵିକାରଶ୍ଚିଦାନନ୍ଦ ଅଣୀୟାନ୍ମହତୋ ମହାନ୍ ॥ ୬୩॥
ଅପୂର୍ଵାଣାଂ ପରଂ ନିତ୍ୟଂ ସ୍ଵୟଂଜ୍ୟୋତିର୍ନିରାମୟମ୍ ।
ଵିରଜଂ ପରମାକାଶଂ ଧ୍ରୁଵମାନନ୍ଦମଵ୍ୟୟମ୍ ॥ ୬୪॥
ଶ୍ରୁତିଃ ପ୍ରତ୍ୟକ୍ଷମୈତିହ୍ୟମନୁମାନଶ୍ଚତୁଷ୍ଟୟମ୍ ।
ୟସ୍ୟ ଚାତ୍ମତପୋ ଵେଦ ଦେଶିକଂ ଚ ସଦା ସ୍ମରେତ୍ ॥ ୬୫॥
ମନୁଞ୍ଚ ୟଦ୍ଭଵଂ କାର୍ୟଂ ତଦ୍ଵଦାମି ମହାମତେ ।
ସାଧୁତ୍ଵଂ ଚ ମୟା ଦୃଷ୍ଟ୍ଵା ତ୍ଵୟି ତିଷ୍ଠତି ସାଂପ୍ରତମ୍ ॥ ୬୬॥
ଅଖଣ୍ଡମଣ୍ଡଲାକାରଂ ଵ୍ୟାପ୍ତଂ ୟେନ ଚରାଚରମ୍ ।
ତତ୍ପଦଂ ଦର୍ଶିତଂ ୟେନ ତସ୍ମୈ ଶ୍ରୀଗୁରଵେ ନମଃ ॥ ୬୭॥
ସର୍ଵଶ୍ରୁତିଶିରୋରତ୍ନଵିରାଜିତପଦାମ୍ବୁଜଃ ।
ଵେଦାନ୍ତାମ୍ବୁଜସୂର୍ୟୋ ୟସ୍ତସ୍ମୈ ଶ୍ରୀଗୁରଵେ ନମଃ ॥ ୬୮॥
ୟସ୍ୟ ସ୍ମରଣମାତ୍ରେଣ ଜ୍ଞାନମୁତ୍ପଦ୍ୟତେ ସ୍ଵୟମ୍ ।
ୟ ଏଵ ସର୍ଵ ସମ୍ପ୍ରାପ୍ତିସ୍ତସ୍ମୈ ଶ୍ରୀଗୁରଵେ ନମଃ ॥ ୬୯॥
ଚୈତନ୍ୟଂ ଶାଶ୍ଵତଂ ଶାନ୍ତଂ ଵ୍ୟୋମାତୀତଂ ନିରଞ୍ଜନମ୍ ।
ନାଦବିନ୍ଦୁକଲାତୀତଂ ତସ୍ମୈ ଶ୍ରୀଗୁରଵେ ନମଃ ॥ ୭୦॥
ସ୍ଥାଵରଂ ଜଙ୍ଗମଂ ଚୈଵ ତଥା ଚୈଵ ଚରାଚରମ୍ ।
ଵ୍ୟାପ୍ତଂ ୟେନ ଜଗତ୍ସର୍ଵଂ ତସ୍ମୈ ଶ୍ରୀଗୁରଵେ ନମଃ ॥ ୭୧॥
ଜ୍ଞାନଶକ୍ତିସମାରୂଢସ୍ତତ୍ତ୍ଵମାଲା ଵିଭୂଷିତଃ ।
ଭୁକ୍ତିମୁକ୍ତିପ୍ରଦାତା ୟସ୍ତସ୍ମୈ ଶ୍ରୀଗୁରଵେ ନମଃ ॥ ୭୨॥
ଅନେକଜନ୍ମସମ୍ପ୍ରାପ୍ତସର୍ଵକର୍ମଵିଦାହିନେ ।
ସ୍ଵାତ୍ମଜ୍ଞାନପ୍ରଭାଵେଣ ତସ୍ମୈ ଶ୍ରୀଗୁରଵେ ନମଃ ॥ ୭୩॥
ନ ଗୁରୋରଧିକଂ ତତ୍ତ୍ଵଂ ନ ଗୁରୋରଧିକଂ ତପଃ ।
ତତ୍ତ୍ଵଂ ଜ୍ଞାନାତ୍ପରଂ ନାସ୍ତି ତସ୍ମୈ ଶ୍ରୀଗୁରଵେ ନମଃ ॥ ୭୪॥
ମନ୍ନାଥଃ ଶ୍ରୀଜଗନ୍ନାଥୋ ମଦ୍ଗୁରୁସ୍ତ୍ରିଜଗଦ୍ଗୁରୁଃ ।
ମମାତ୍ମା ସର୍ଵଭୂତାତ୍ମା ତସ୍ମୈ ଶ୍ରୀଗୁରଵେ ନମଃ ॥ ୭୫॥
ଧ୍ୟାନମୂଲଂ ଗୁରୋର୍ମୂର୍ତିଃ ପୂଜାମୂଲଂ ଗୁରୋଃ ପଦମ୍ ।
ମନ୍ତ୍ରମୂଲଂ ଗୁରୋର୍ଵାକ୍ୟଂ ମୋକ୍ଷମୂଲଂ ଗୁରୋଃ କୃପା ॥ ୭୬॥
ଗୁରୁରାଦିରନାଦିଶ୍ଚ ଗୁରୁଃ ପରମଦୈଵତମ୍ ।
ଗୁରୋଃ ପରତରଂ ନାସ୍ତି ତସ୍ମୈ ଶ୍ରୀଗୁରଵେ ନମଃ ॥ ୭୭॥
ସପ୍ତସାଗରପର୍ୟନ୍ତ ତୀର୍ଥସ୍ନାନାଦିକଂ ଫଲମ୍ ।
ଗୁରୋରଙ୍ଘ୍ରିପୟୋବିନ୍ଦୁସହସ୍ରାଂଶେ ନ ଦୁର୍ଲଭମ୍ ॥ ୭୮॥
ହରୌ ରୁଷ୍ଟେ ଗୁରୁସ୍ତ୍ରାତା ଗୁରୌ ରୁଷ୍ଟେ ନ କଶ୍ଚନ ।
ତସ୍ମାତ୍ସର୍ଵପ୍ରୟତ୍ନେନ ଶ୍ରୀଗୁରୁଂ ଶରଣଂ ଵ୍ରଜେତ୍ ॥ ୭୯॥
ଗୁରୁରେଵ ଜଗତ୍ସର୍ଵଂ ବ୍ରହ୍ମଵିଷ୍ଣୁଶିଵାତ୍ମକମ୍ ।
ଗୁରୋଃ ପରତରଂ ନାସ୍ତି ତସ୍ମାତ୍ସମ୍ପୂଜୟେଦ୍ଗୁରୁମ୍ ॥ ୮୦॥
ଜ୍ଞାନଂ ଵିଜ୍ଞାନସହିତଂ ଲଭ୍ୟତେ ଗୁରୁଭକ୍ତିତଃ ।
ଗୁରୋଃ ପରତରଂ ନାସ୍ତି ଧ୍ୟେୟୋଽସୌ ଗୁରୁମାର୍ଗିଭିଃ ॥ ୮୧॥
ୟସ୍ମାତ୍ପରତରଂ ନାସ୍ତି ନେତି ନେତୀତି ଵୈ ଶ୍ରୁତିଃ ।
ମନସା ଵଚସା ଚୈଵ ନିତ୍ୟମାରାଧୟେଦ୍ଗୁରୁମ୍ ॥ ୮୨॥
ଗୁରୋଃ କୃପା ପ୍ରସାଦେନ ବ୍ରହ୍ମଵିଷ୍ଣୁସଦାଶିଵାଃ ।
ସମର୍ଥାଃ ପ୍ରଭଵାଦୌ ଚ କେଵଲଂ ଗୁରୁସେଵୟା ॥ ୮୩॥
ଦେଵକିନ୍ନରଗନ୍ଧର୍ଵାଃ ପିତରୋ ୟକ୍ଷଚାରଣାଃ ।
ମୁନୟୋଽପି ନ ଜାନନ୍ତି ଗୁରୁଶୁଶ୍ରୂଷଣେ ଵିଧିମ୍ ॥ ୮୪॥
ମହାହଙ୍କାରଗର୍ଵେଣ ତପୋଵିଦ୍ୟାବଲାନ୍ଵିତାଃ ।
ସଂସାରକୁହରାଵର୍ତେ ଘଟୟନ୍ତ୍ରେ ୟଥା ଘଟାଃ ॥ ୮୫॥
ନ ମୁକ୍ତା ଦେଵଗନ୍ଧର୍ଵାଃ ପିତରୋ ୟକ୍ଷକିନ୍ନରାଃ ।
ଋଷୟଃ ସର୍ଵସିଦ୍ଧାଶ୍ଚ ଗୁରୁସେଵା ପରାଙ୍ମୁଖାଃ ॥ ୮୬॥
ଧ୍ୟାନଂ ଶୃଣୁ ମହାଦେଵି ସର୍ଵାନନ୍ଦପ୍ରଦାୟକମ୍ ।
ସର୍ଵସୌଖ୍ୟକରଂ ନିତ୍ୟଂ ଭୁକ୍ତିମୁକ୍ତିଵିଧାୟକମ୍ ॥ ୮୭॥
ଶ୍ରୀମତ୍ପରବ୍ରହ୍ମ ଗୁରୁଂ ସ୍ମରାମି
ଶ୍ରୀମତ୍ପରବ୍ରହ୍ମ ଗୁରୁଂ ଵଦାମି ।
ଶ୍ରୀମତ୍ପରବ୍ରହ୍ମ ଗୁରୁଂ ନମାମି
ଶ୍ରୀମତ୍ପରବ୍ରହ୍ମ ଗୁରୁଂ ଭଜାମି ॥ ୮୮॥
ବ୍ରହ୍ମାନନ୍ଦଂ ପରମସୁଖଦଂ କେଵଲଂ ଜ୍ଞାନମୂର୍ତିଂ
ଦ୍ଵନ୍ଦ୍ଵାତୀତଂ ଗଗନସଦୃଶଂ ତତ୍ତ୍ଵମସ୍ୟାଦିଲକ୍ଷ୍ୟମ୍ ।
ଏକଂ ନିତ୍ୟଂ ଵିମଲମଚଲଂ ସର୍ଵଧୀସାକ୍ଷିଭୂତଂ
ଭାଵାତୀତଂ ତ୍ରିଗୁଣରହିତଂ ସଦ୍ଗୁରୁଂ ତଂ ନମାମି ॥ ୮୯॥
ନିତ୍ୟଂ ଶୁଦ୍ଧଂ ନିରାଭାସଂ ନିରାକାରଂ ନିରଞ୍ଜନମ୍ ।
ନିତ୍ୟବୋଧଂ ଚିଦାନନ୍ଦଂ ଗୁରୁଂ ବ୍ରହ୍ମ ନମାମ୍ୟହମ୍ ॥ ୯୦॥
ହୃଦମ୍ବୁଜେ କର୍ଣିକମଧ୍ୟସଂସ୍ଥେ
ସିଂହାସନେ ସଂସ୍ଥିତଦିଵ୍ୟମୂର୍ତିମ୍ ।
ଧ୍ୟାୟେଦ୍ଗୁରୁଂ ଚନ୍ଦ୍ରକଲାପ୍ରକାଶଂ
ଚିତ୍ପୁସ୍ତକାଭୀଷ୍ଟଵରଂ ଦଧାନମ୍ ॥ ୯୧॥
ଶ୍ଵେତାମ୍ବରଂ ଶ୍ଵେତଵିଲେପପୁଷ୍ପଂ
ମୁକ୍ତାଵିଭୂଷଂ ମୁଦିତଂ ଦ୍ଵିନେତ୍ରମ୍ ।
ଵାମାଙ୍କପୀଠସ୍ଥିତଦିଵ୍ୟଶକ୍ତିଂ
ମନ୍ଦସ୍ମିତଂ ସାନ୍ଦ୍ରକୃପାନିଧାନମ୍ ॥ ୯୨॥
ଆନନ୍ଦମାନନ୍ଦକରଂ ପ୍ରସନ୍ନଂ
ଜ୍ଞାନସ୍ଵରୂପଂ ନିଜବୋଧୟୁକ୍ତମ୍ ।
ୟୋଗୀନ୍ଦ୍ରମୀଡ୍ୟଂ ଭଵରୋଗଵୈଦ୍ୟଂ
ଶ୍ରୀମଦ୍ଗୁରୁଂ ନିତ୍ୟମହଂ ନମାମି ॥ ୯୩॥
ୟସ୍ମିନ୍ସୃଷ୍ଟିସ୍ଥିତିଧ୍ଵଂସନିଗ୍ରହାନୁଗ୍ରହାତ୍ମକମ୍ ।
କୃତ୍ୟଂ ପଞ୍ଚଵିଧଂ ଶଶ୍ଵଦ୍ଭାସତେ ତଂ ନମାମ୍ୟହମ୍ ॥ ୯୪॥
ପ୍ରାତଃ ଶିରସି ଶୁକ୍ଲାବ୍ଜେ ଦ୍ଵିନେତ୍ରଂ ଦ୍ଵିଭୁଜଂ ଗୁରୁମ୍ ।
ଵରାଭୟୟୁତଂ ଶାନ୍ତଂ ସ୍ମରେତ୍ତଂ ନାମପୂର୍ଵକମ୍ ॥ ୯୫॥
ନ ଗୁରୋରଧିକଂ ନ ଗୁରୋରଧିକଂ
ନ ଗୁରୋରଧିକଂ ନ ଗୁରୋରଧିକମ୍ ।
ଶିଵଶାସନତଃ ଶିଵଶାସନତଃ
ଶିଵଶାସନତଃ ଶିଵଶାସନତଃ ॥ ୯୬॥
ଇଦମେଵ ଶିଵଂ ତ୍ଵିଦମେଵ ଶିଵଂ
ତ୍ଵିଦମେଵ ଶିଵଂ ତ୍ଵିଦମେଵ ଶିଵମ୍ ।
ମମ ଶାସନତୋ ମମ ଶାସନତୋ
ମମ ଶାସନତୋ ମମ ଶାସନତଃ ॥ ୯୭॥
ଏଵଂଵିଧଂ ଗୁରୁଂ ଧ୍ୟାତ୍ଵା ଜ୍ଞାନମୁତ୍ପଦ୍ୟତେ ସ୍ଵୟମ୍ ।
ତତ୍ସଦ୍ଗୁରୁପ୍ରସାଦେନ ମୁକ୍ତୋଽହମିତି ଭାଵୟେତ୍ ॥ ୯୮॥
ଗୁରୁଦର୍ଶିତମାର୍ଗେଣ ମନଃଶୁଦ୍ଧିଂ ତୁ କାରୟେତ୍ ।
ଅନିତ୍ୟଂ ଖଣ୍ଡୟେତ୍ସର୍ଵଂ ୟତ୍କିଞ୍ଚିଦାତ୍ମଗୋଚରମ୍ ॥ ୯୯॥
ଜ୍ଞେୟଂ ସର୍ଵସ୍ଵରୂପଂ ଚ ଜ୍ଞାନଂ ଚ ମନ ଉଚ୍ୟତେ ।
ଜ୍ଞାନଂ ଜ୍ଞେୟସମଂ କୁର୍ୟାନ୍ ନାନ୍ୟଃ ପନ୍ଥା ଦ୍ଵିତୀୟକଃ ॥ ୧୦୦॥
ଏଵଂ ଶ୍ରୁତ୍ଵା ମହାଦେଵି ଗୁରୁନିନ୍ଦାଂ କରୋତି ୟଃ ।
ସ ୟାତି ନରକଂ ଘୋରଂ ୟାଵଚ୍ଚନ୍ଦ୍ରଦିଵାକରୌ ॥ ୧୦୧॥
ୟାଵତ୍କଲ୍ପାନ୍ତକୋ ଦେହସ୍ତାଵଦେଵ ଗୁରୁଂ ସ୍ମରେତ୍ ।
ଗୁରୁଲୋପୋ ନ କର୍ତଵ୍ୟଃ ସ୍ଵଚ୍ଛନ୍ଦୋ ୟଦି ଵା ଭଵେତ୍ ॥ ୧୦୨॥
ହୁଙ୍କାରେଣ ନ ଵକ୍ତଵ୍ୟଂ ପ୍ରାଜ୍ଞୈଃ ଶିଷ୍ୟୈଃ କଥଞ୍ଚନ ।
ଗୁରୋରଗ୍ରେ ନ ଵକ୍ତଵ୍ୟମସତ୍ୟଂ ଚ କଦାଚନ ॥ ୧୦୩॥
ଗୁରୁଂ ତ୍ଵଂକୃତ୍ୟ ହୁଂକୃତ୍ୟ ଗୁରୁଂ ନିର୍ଜିତ୍ୟ ଵାଦତଃ ।
ଅରଣ୍ୟେ ନିର୍ଜଲେ ଦେଶେ ସ ଭଵେଦ୍ବ୍ରହ୍ମରାକ୍ଷସଃ ॥ ୧୦୪॥
ମୁନିଭିଃ ପନ୍ନଗୈର୍ଵାଽପି ସୁରୈର୍ଵା ଶାପିତୋ ୟଦି ।
କାଲମୃତ୍ୟୁଭୟାଦ୍ଵାପି ଗୁରୂ ରକ୍ଷତି ପାର୍ଵତି ॥ ୧୦୫॥
ଅଶକ୍ତା ହି ସୁରାଦ୍ୟାଶ୍ଚ ଅଶକ୍ତା ମୁନୟସ୍ତଥା ।
ଗୁରୁଶାପେନ ତେ ଶୀଘ୍ରଂ କ୍ଷୟଂ ୟାନ୍ତି ନ ସଂଶୟଃ ॥ ୧୦୬॥
ମନ୍ତ୍ରରାଜମିଦଂ ଦେଵି ଗୁରୁରିତ୍ୟକ୍ଷରଦ୍ଵୟମ୍ ।
ସ୍ମୃତିଵେଦାର୍ଥଵାକ୍ୟେନ ଗୁରୁଃ ସାକ୍ଷାତ୍ପରଂ ପଦମ୍ ॥ ୧୦୭॥
ଶ୍ରୁତିସ୍ମୃତୀ ଅଵିଜ୍ଞାୟ କେଵଲଂ ଗୁରୁସେଵକାଃ ।
ତେ ଵୈ ସଂନ୍ୟାସିନଃ ପ୍ରୋକ୍ତା ଇତରେ ଵେଷଧାରିଣଃ ॥ ୧୦୮॥
ନିତ୍ୟଂ ବ୍ରହ୍ମ ନିରାକାରଂ ନିର୍ଗୁଣଂ ବୋଧୟେତ୍ ପରମ୍ ।
ସର୍ଵଂ ବ୍ରହ୍ମ ନିରାଭାସଂ ଦୀପୋ ଦୀପାନ୍ତରଂ ୟଥା ॥ ୧୦୯॥
ଗୁରୋଃ କୃପାପ୍ରସାଦେନ ଆତ୍ମାରାମଂ ନିରୀକ୍ଷୟେତ୍ ।
ଅନେନ ଗୁରୁମାର୍ଗେଣ ସ୍ଵାତ୍ମଜ୍ଞାନଂ ପ୍ରଵର୍ତତେ ॥ ୧୧୦॥
ଆବ୍ରହ୍ମ ସ୍ତଂବପର୍ୟନ୍ତଂ ପରମାତ୍ମସ୍ଵରୂପକମ୍ ।
ସ୍ଥାଵରଂ ଜଙ୍ଗମଂ ଚୈଵ ପ୍ରଣମାମି ଜଗନ୍ମୟମ୍ ॥ ୧୧୧॥
ଵନ୍ଦେଽହଂ ସଚ୍ଚିଦାନନ୍ଦଂ ଭେଦାତୀତଂ ସଦା ଗୁରୁମ୍ ।
ନିତ୍ୟଂ ପୂର୍ଣଂ ନିରାକାରଂ ନିର୍ଗୁଣଂ ସ୍ଵାତ୍ମସଂସ୍ଥିତମ୍ ॥ ୧୧୨॥
ପରାତ୍ପରତରଂ ଧ୍ୟେୟଂ ନିତ୍ୟମାନନ୍ଦକାରକମ୍ ।
ହୃଦୟାକାଶମଧ୍ୟସ୍ଥଂ ଶୁଦ୍ଧସ୍ଫଟିକସନ୍ନିଭମ୍ ॥ ୧୧୩॥
ସ୍ଫଟିକପ୍ରତିମାରୂପଂ ଦୃଶ୍ୟତେ ଦର୍ପଣେ ୟଥା ।
ତଥାତ୍ମନି ଚିଦାକାରମାନନ୍ଦଂ ସୋଽହମିତ୍ୟୁତ ॥ ୧୧୪॥
ଅଙ୍ଗୁଷ୍ଠମାତ୍ରପୁରୁଷଂ ଧ୍ୟାୟତଶ୍ଚିନ୍ମୟଂ ହୃଦି ।
ତତ୍ର ସ୍ଫୁରତି ଭାଵୋ ୟଃ ଶୃଣୁ ତଂ କଥୟାମ୍ୟହମ୍ ॥ ୧୧୫॥
ଅଗୋଚରଂ ତଥାଽଗମ୍ୟଂ ନାମରୂପଵିଵର୍ଜିତମ୍ ।
ନିଃଶବ୍ଦଂ ତଦ୍ଵିଜାନୀୟାତ୍ ସ୍ଵଭାଵଂ ବ୍ରହ୍ମ ପାର୍ଵତି ॥ ୧୧୬॥
ୟଥା ଗନ୍ଧଃ ସ୍ଵଭାଵେନ କର୍ପୂରକୁସୁମାଦିଷୁ ।
ଶୀତୋଷ୍ଣାଦି ସ୍ଵଭାଵେନ ତଥା ବ୍ରହ୍ମ ଚ ଶାଶ୍ଵତମ୍ ॥ ୧୧୭॥
ସ୍ଵୟଂ ତଥାଵିଧୋ ଭୂତ୍ଵା ସ୍ଥାତଵ୍ୟଂ ୟତ୍ରକୁତ୍ରଚିତ୍ ।
କୀଟଭ୍ରମରଵତ୍ତତ୍ର ଧ୍ୟାନଂ ଭଵତି ତାଦୃଶମ୍ ॥ ୧୧୮॥
ଗୁରୁଧ୍ୟାନଂ ତଥା କୃତ୍ଵା ସ୍ଵୟଂ ବ୍ରହ୍ମମୟୋ ଭଵେତ୍ ।
ପିଣ୍ଡେ ପଦେ ତଥା ରୂପେ ମୁକ୍ତୋଽସୌ ନାତ୍ର ସଂଶୟଃ ॥ ୧୧୯॥
ଶ୍ରୀ ପାର୍ଵତ୍ୟୁଵାଚ -
ପିଣ୍ଡଂ କିଂ ତୁ ମହାଦେଵ ପଦଂ କିଂ ସମୁଦାହୃତମ୍ ।
ରୂପାତୀତଂ ଚ ରୂପଂ କିମେତଦାଖ୍ୟାହି ଶଙ୍କର ॥ ୧୨୦॥
ଶ୍ରୀ ମହାଦେଵ ଉଵାଚ -
ପିଣ୍ଡଂ କୁଣ୍ଡଲିନୀଶକ୍ତିଃ ପଦଂ ହଂସମୁଦାହୃତମ୍ ।
ରୂପଂ ବିନ୍ଦୁରିତି ଜ୍ଞେୟଂ ରୂପାତୀତଂ ନିରଞ୍ଜନମ୍ ॥ ୧୨୧॥
ପିଣ୍ଡେ ମୁକ୍ତା ପଦେ ମୁକ୍ତା ରୂପେ ମୁକ୍ତା ଵରାନନେ ।
ରୂପାତୀତେ ତୁ ୟେ ମୁକ୍ତାସ୍ତେ ମୁକ୍ତା ନାତ୍ର ସଂଶୟଃ ॥ ୧୨୨॥
ସ୍ଵୟଂ ସର୍ଵମୟୋ ଭୂତ୍ଵା ପରଂ ତତ୍ତ୍ଵଂ ଵିଲୋକୟେତ୍ ।
ପରାତ୍ପରତରଂ ନାନ୍ୟତ୍ ସର୍ଵମେତନ୍ନିରାଲୟମ୍ ॥ ୧୨୩॥
ତସ୍ୟାଵଲୋକନଂ ପ୍ରାପ୍ୟ ସର୍ଵସଙ୍ଗଵିଵର୍ଜିତଃ ।
ଏକାକୀ ନିଃସ୍ପୃହଃ ଶାନ୍ତସ୍ତିଷ୍ଠାସେତ୍ତତ୍ପ୍ରସାଦତଃ ॥ ୧୨୪॥
ଲବ୍ଧଂ ଵାଽଥ ନ ଲବ୍ଧଂ ଵା ସ୍ଵଲ୍ପଂ ଵା ବହୁଲଂ ତଥା ।
ନିଷ୍କାମେନୈଵ ଭୋକ୍ତଵ୍ୟଂ ସଦା ସଂତୁଷ୍ଟଚେତସା ॥ ୧୨୫॥
ସର୍ଵଜ୍ଞପଦମିତ୍ୟାହୁର୍ଦେହୀ ସର୍ଵମୟୋ ବୁଧାଃ ।
ସଦାନନ୍ଦଃ ସଦା ଶାନ୍ତୋ ରମତେ ୟତ୍ରକୁତ୍ରଚିତ୍ ॥ ୧୨୬॥
ୟତ୍ରୈଵ ତିଷ୍ଠତେ ସୋଽପି ସ ଦେଶଃ ପୁଣ୍ୟଭାଜନମ୍ ।
ମୁକ୍ତସ୍ୟ ଲକ୍ଷଣଂ ଦେଵି ତଵାଗ୍ରେ କଥିତଂ ମୟା ॥ ୧୨୭॥
ଉପଦେଶସ୍ତଥା ଦେଵି ଗୁରୁମାର୍ଗେଣ ମୁକ୍ତିଦଃ ।
ଗୁରୁଭକ୍ତିସ୍ତଥା ଧ୍ୟାନଂ ସକଲଂ ତଵ କୀର୍ତିତମ୍ ॥ ୧୨୮॥
ଅନେନ ୟଦ୍ଭଵେତ୍କାର୍ୟଂ ତଦ୍ଵଦାମି ମହାମତେ ।
ଲୋକୋପକାରକଂ ଦେଵି ଲୌକିକଂ ତୁ ନ ଭାଵୟେତ୍ ॥ ୧୨୯॥
ଲୌକିକାତ୍କର୍ମଣୋ ୟାନ୍ତି ଜ୍ଞାନହୀନା ଭଵାର୍ଣଵମ୍ ।
ଜ୍ଞାନୀ ତୁ ଭାଵୟେତ୍ସର୍ଵଂ କର୍ମ ନିଷ୍କର୍ମ ୟତ୍କୃତମ୍ ॥ ୧୩୦॥
ଇଦଂ ତୁ ଭକ୍ତିଭାଵେନ ପଠତେ ଶୃଣୁତେ ୟଦି ।
ଲିଖିତ୍ଵା ତତ୍ପ୍ରଦାତଵ୍ୟଂ ତତ୍ସର୍ଵଂ ସଫଲଂ ଭଵେତ୍ ॥ ୧୩୧॥
ଗୁରୁଗୀତାତ୍ମକଂ ଦେଵି ଶୁଦ୍ଧତତ୍ତ୍ଵଂ ମୟୋଦିତମ୍ ।
ଭଵଵ୍ୟାଧିଵିନାଶାର୍ଥଂ ସ୍ଵୟମେଵ ଜପେତ୍ସଦା ॥ ୧୩୨॥
ଗୁରୁଗୀତାକ୍ଷରୈକଂ ତୁ ମନ୍ତ୍ରରାଜମିମଂ ଜପେତ୍ ।
ଅନ୍ୟେ ଚ ଵିଵିଧା ମନ୍ତ୍ରାଃ କଲାଂ ନାର୍ହନ୍ତି ଷୋଡଶୀମ୍ ॥ ୧୩୩॥
ଅନନ୍ତଫଲମାପ୍ନୋତି ଗୁରୁଗୀତାଜପେନ ତୁ ।
ସର୍ଵପାପପ୍ରଶମନଂ ସର୍ଵଦାରିଦ୍ର୍ୟନାଶନମ୍ ॥ ୧୩୪॥
କାଲମୃତ୍ୟୁଭୟହରଂ ସର୍ଵସଙ୍କଟନାଶନମ୍ ।
ୟକ୍ଷରାକ୍ଷସଭୂତାନାଂ ଚୋରଵ୍ୟାଘ୍ରଭୟାପହମ୍ ॥ ୧୩୫॥
ମହାଵ୍ୟାଧିହରଂ ସର୍ଵଂ ଵିଭୂତିସିଦ୍ଧିଦଂ ଭଵେତ୍ ।
ଅଥଵା ମୋହନଂ ଵଶ୍ୟଂ ସ୍ଵୟମେଵ ଜପେତ୍ସଦା ॥ ୧୩୬॥
ଵସ୍ତ୍ରାସନେ ଚ ଦାରିଦ୍ର୍ୟଂ ପାଷାଣେ ରୋଗସଂଭଵଃ ।
ମୋଦିନ୍ୟାଂ ଦୁଃଖମାପ୍ନୋତି କାଷ୍ଠେ ଭଵତି ନିଷ୍ଫଲମ୍ ॥ ୧୩୭॥
କୃଷ୍ଣାଜିନେ ଜ୍ଞାନସିଦ୍ଧିର୍ମୋକ୍ଷଶ୍ରୀ ଵ୍ୟାଘ୍ରଚର୍ମଣି ।
କୁଶାସନେ ଜ୍ଞାନସିଦ୍ଧିଃ ସର୍ଵସିଦ୍ଧିସ୍ତୁ କଂବଲେ ॥ ୧୩୮॥
କୁଶୈର୍ଵା ଦୂର୍ଵୟା ଦେଵି ଆସନେ ଶୁଭ୍ରକଂବଲେ ।
ଉପଵିଶ୍ୟ ତତୋ ଦେଵି ଜପେଦେକାଗ୍ରମାନସଃ ॥ ୧୩୯॥
ଧ୍ୟେୟଂ ଶୁକ୍ଲଂ ଚ ଶାନ୍ତ୍ୟର୍ଥଂ ଵଶ୍ୟେ ରକ୍ତାସନଂ ପ୍ରିୟେ ।
ଅଭିଚାରେ କୃଷ୍ଣଵର୍ଣଂ ପୀତଵର୍ଣଂ ଧନାଗମେ ॥ ୧୪୦॥
ଉତ୍ତରେ ଶାନ୍ତିକାମସ୍ତୁ ଵଶ୍ୟେ ପୂର୍ଵମୁଖୋ ଜପେତ୍ ।
ଦକ୍ଷିଣେ ମାରଣଂ ପ୍ରୋକ୍ତଂ ପଶ୍ଚିମେ ଚ ଧନାଗମଃ ॥ ୧୪୧॥
ମୋହନଂ ସର୍ଵଭୂତାନାଂ ବନ୍ଧମୋକ୍ଷକରଂ ଭଵେତ୍ ।
ଦେଵରାଜପ୍ରିୟକରଂ ସର୍ଵଲୋକଵଶଂ ଭଵେତ୍ ॥ ୧୪୨॥
ସର୍ଵେଷାଂ ସ୍ତଂଭନକରଂ ଗୁଣାନାଂ ଚ ଵିଵର୍ଧନମ୍ ।
ଦୁଷ୍କର୍ମନାଶନଂ ଚୈଵ ସୁକର୍ମସିଦ୍ଧିଦଂ ଭଵେତ୍ ॥ ୧୪୩॥
ଅସିଦ୍ଧଂ ସାଧୟେତ୍କାର୍ୟଂ ନଵଗ୍ରହଭୟାପହମ୍ ।
ଦୁଃସ୍ଵପ୍ନନାଶନଂ ଚୈଵ ସୁସ୍ଵପ୍ନଫଲଦାୟକମ୍ ॥ ୧୪୪॥
ସର୍ଵଶାନ୍ତିକରଂ ନିତ୍ୟଂ ତଥା ଵନ୍ଧ୍ୟାସୁପୁତ୍ରଦମ୍ ।
ଅଵୈଧଵ୍ୟକରଂ ସ୍ତ୍ରୀଣାଂ ସୌଭାଗ୍ୟଦାୟକଂ ସଦା ॥ ୧୪୫॥
ଆୟୁରାରୋଗ୍ୟମୈଶ୍ଵର୍ୟପୁତ୍ରପୌତ୍ରପ୍ରଵର୍ଧନମ୍ ।
ଅକାମତଃ ସ୍ତ୍ରୀ ଵିଧଵା ଜପାନ୍ମୋକ୍ଷମଵାପ୍ନୁୟାତ୍ ॥ ୧୪୬॥
ଅଵୈଧଵ୍ୟଂ ସକାମା ତୁ ଲଭତେ ଚାନ୍ୟଜନ୍ମନି ।
ସର୍ଵଦୁଃଖଭୟଂ ଵିଘ୍ନଂ ନାଶୟେଚ୍ଛାପହାରକମ୍ ॥ ୧୪୭॥
ସର୍ଵବାଧାପ୍ରଶମନଂ ଧର୍ମାର୍ଥକାମମୋକ୍ଷଦମ୍ ।
ୟଂ ୟଂ ଚିନ୍ତୟତେ କାମଂ ତଂ ତଂ ପ୍ରାପ୍ନୋତି ନିଶ୍ଚିତମ୍ ॥ ୧୪୮॥
କାମିତସ୍ୟ କାମଧେନୁଃ କଲ୍ପନାକଲ୍ପପାଦପଃ ।
ଚିନ୍ତାମଣିଶ୍ଚିନ୍ତିତସ୍ୟ ସର୍ଵମଙ୍ଗଲକାରକମ୍ ॥ ୧୪୯॥
ମୋକ୍ଷହେତୁର୍ଜପେନ୍ନିତ୍ୟଂ ମୋକ୍ଷଶ୍ରିୟମଵାପ୍ନୁୟାତ୍ ।
ଭୋଗକାମୋ ଜପେଦ୍ୟୋ ଵୈ ତସ୍ୟ କାମଫଲପ୍ରଦମ୍ ॥ ୧୫୦॥
ଜପେଚ୍ଛାକ୍ତଶ୍ଚ ସୌରଶ୍ଚ ଗାଣପତ୍ୟଶ୍ଚ ଵୈଷ୍ଣଵଃ ।
ଶୈଵଶ୍ଚ ସିଦ୍ଧିଦଂ ଦେଵି ସତ୍ୟଂ ସତ୍ୟଂ ନ ସଂଶୟଃ ॥ ୧୫୧॥
ଅଥ କାମ୍ୟଜପେ ସ୍ଥାନଂ କଥୟାମି ଵରାନନେ ।
ସାଗରେ ଵା ସରିତ୍ତୀରେଽଥଵା ହରିହରାଲୟେ ॥ ୧୫୨॥
ଶକ୍ତିଦେଵାଲୟେ ଗୋଷ୍ଠେ ସର୍ଵଦେଵାଲୟେ ଶୁଭେ ।
ଵଟେ ଚ ଧାତ୍ରୀମୂଲେ ଵା ମଠେ ଵୃନ୍ଦାଵନେ ତଥା ॥ ୧୫୩॥
ପଵିତ୍ରେ ନିର୍ମଲେ ସ୍ଥାନେ ନିତ୍ୟାନୁଷ୍ଠାନତୋଽପି ଵା ।
ନିର୍ଵେଦନେନ ମୌନେନ ଜପମେତଂ ସମାଚରେତ୍ ॥ ୧୫୪॥
ଶ୍ମଶାନେ ଭୟଭୂମୌ ତୁ ଵଟମୂଲାନ୍ତିକେ ତଥା ।
ସିଦ୍ଧ୍ୟନ୍ତି ଧୌତ୍ତରେ ମୂଲେ ଚୂତଵୃକ୍ଷସ୍ୟ ସନ୍ନିଧୌ ॥ ୧୫୫॥
ଗୁରୁପୁତ୍ରୋ ଵରଂ ମୂର୍ଖସ୍ତସ୍ୟ ସିଦ୍ଧ୍ୟନ୍ତି ନାନ୍ୟଥା ।
ଶୁଭକର୍ମାଣି ସର୍ଵାଣି ଦୀକ୍ଷାଵ୍ରତତପାଂସି ଚ ॥ ୧୫୬॥
ସଂସାରମଲନାଶାର୍ଥଂ ଭଵପାଶନିଵୃତ୍ତୟେ ।
ଗୁରୁଗୀତାମ୍ଭସି ସ୍ନାନଂ ତତ୍ତ୍ଵଜ୍ଞଃ କୁରୁତେ ସଦା ॥ ୧୫୭॥
ସ ଏଵ ଚ ଗୁରୁଃ ସାକ୍ଷାତ୍ ସଦା ସଦ୍ବ୍ରହ୍ମଵିତ୍ତମଃ ।
ତସ୍ୟ ସ୍ଥାନାନି ସର୍ଵାଣି ପଵିତ୍ରାଣି ନ ସଂଶୟଃ ॥ ୧୫୮॥
ସର୍ଵଶୁଦ୍ଧଃ ପଵିତ୍ରୋଽସୌ ସ୍ଵଭାଵାଦ୍ୟତ୍ର ତିଷ୍ଠତି ।
ତତ୍ର ଦେଵଗଣାଃ ସର୍ଵେ କ୍ଷେତ୍ରେ ପୀଠେ ଵସନ୍ତି ହି ॥ ୧୫୯॥
ଆସନସ୍ଥଃ ଶୟାନୋ ଵା ଗଚ୍ଛଂସ୍ତିଷ୍ଠନ୍ ଵଦନ୍ନପି ।
ଅଶ୍ଵାରୂଢୋ ଗଜାରୂଢଃ ସୁପ୍ତୋ ଵା ଜାଗୃତୋଽପି ଵା ॥ ୧୬୦॥
ଶୁଚିଷ୍ମାଂଶ୍ଚ ସଦା ଜ୍ଞାନୀ ଗୁରୁଗୀତାଜପେନ ତୁ ।
ତସ୍ୟ ଦର୍ଶନମାତ୍ରେଣ ପୁନର୍ଜନ୍ମ ନ ଵିଦ୍ୟତେ ॥ ୧୬୧॥
ସମୁଦ୍ରେ ଚ ୟଥା ତୋୟଂ କ୍ଷୀରେ କ୍ଷୀରଂ ଘୃତେ ଘୃତମ୍ ।
ଭିନ୍ନେ କୁଂଭେ ୟଥାକାଶସ୍ତଥାତ୍ମା ପରମାତ୍ମନି ॥ ୧୬୨॥
ତଥୈଵ ଜ୍ଞାନୀ ଜୀଵାତ୍ମା ପରମାତ୍ମନି ଲୀୟତେ ।
ଐକ୍ୟେନ ରମତେ ଜ୍ଞାନୀ ୟତ୍ର ତତ୍ର ଦିଵାନିଶମ୍ ॥ ୧୬୩॥
ଏଵଂଵିଧୋ ମହାମୁକ୍ତଃ ସର୍ଵଦା ଵର୍ତତେ ବୁଧଃ ।
ତସ୍ୟ ସର୍ଵପ୍ରୟତ୍ନେନ ଭାଵଭକ୍ତିଂ କରୋତି ୟଃ ॥ ୧୬୪॥
ସର୍ଵସନ୍ଦେହରହିତୋ ମୁକ୍ତୋ ଭଵତି ପାର୍ଵତି ।
ଭୁକ୍ତିମୁକ୍ତିଦ୍ଵୟଂ ତସ୍ୟ ଜିହ୍ଵାଗ୍ରେ ଚ ସରସ୍ଵତୀ ॥ ୧୬୫॥
ଅନେନ ପ୍ରାଣିନଃ ସର୍ଵେ ଗୁରୁଗୀତା ଜପେନ ତୁ ।
ସର୍ଵସିଦ୍ଧିଂ ପ୍ରାପ୍ନୁଵନ୍ତି ଭୁକ୍ତିଂ ମୁକ୍ତିଂ ନ ସଂଶୟଃ ॥ ୧୬୬॥
ସତ୍ୟଂ ସତ୍ୟଂ ପୁନଃ ସତ୍ୟଂ ଧର୍ମ୍ୟଂ ସାଙ୍ଖ୍ୟଂ ମୟୋଦିତମ୍ ।
ଗୁରୁଗୀତାସମଂ ନାସ୍ତି ସତ୍ୟଂ ସତ୍ୟଂ ଵରାନନେ ॥ ୧୬୭॥
ଏକୋ ଦେଵ ଏକଧର୍ମ ଏକନିଷ୍ଠା ପରଂ ତପଃ ।
ଗୁରୋଃ ପରତରଂ ନାନ୍ୟନ୍ନାସ୍ତି ତତ୍ତ୍ଵଂ ଗୁରୋଃ ପରମ୍ ॥ ୧୬୮॥
ମାତା ଧନ୍ୟା ପିତା ଧନ୍ୟୋ ଧନ୍ୟୋ ଵଂଶଃ କୁଲଂ ତଥା ।
ଧନ୍ୟା ଚ ଵସୁଧା ଦେଵି ଗୁରୁଭକ୍ତିଃ ସୁଦୁର୍ଲଭା ॥ ୧୬୯॥
ଶରୀରମିନ୍ଦ୍ରିୟଂ ପ୍ରାଣାଶ୍ଚାର୍ଥଃ ସ୍ଵଜନବାନ୍ଧଵାଃ ।
ମାତା ପିତା କୁଲଂ ଦେଵି ଗୁରୁରେଵ ନ ସଂଶୟଃ ॥ ୧୭୦॥
ଆକଲ୍ପଜନ୍ମନା କୋଟ୍ୟା ଜପଵ୍ରତତପଃକ୍ରିୟାଃ ।
ତତ୍ସର୍ଵଂ ସଫଲଂ ଦେଵି ଗୁରୁସଂତୋଷମାତ୍ରତଃ ॥ ୧୭୧॥
ଵିଦ୍ୟାତପୋବଲେନୈଵ ମନ୍ଦଭାଗ୍ୟାଶ୍ଚ ୟେ ନରାଃ ।
ଗୁରୁସେଵାଂ ନ କୁର୍ଵନ୍ତି ସତ୍ୟଂ ସତ୍ୟଂ ଵରାନନେ ॥ ୧୭୨॥
ବ୍ରହ୍ମଵିଷ୍ଣୁମହେଶାଶ୍ଚ ଦେଵର୍ଷିପିତୃକିନ୍ନରାଃ ।
ସିଦ୍ଧଚାରଣୟକ୍ଷାଶ୍ଚ ଅନ୍ୟେଽପି ମୁନୟୋ ଜନାଃ ॥ ୧୭୩॥
ଗୁରୁଭାଵଃ ପରଂ ତୀର୍ଥମନ୍ୟତୀର୍ଥଂ ନିରର୍ଥକମ୍ ।
ସର୍ଵତୀର୍ଥାଶ୍ରୟଂ ଦେଵି ପାଦାଙ୍ଗୁଷ୍ଠଂ ଚ ଵର୍ତତେ ॥ ୧୭୪॥
ଜପେନ ଜୟମାପ୍ନୋତି ଚାନନ୍ତଫଲମାପ୍ନୁୟାତ୍ ।
ହୀନକର୍ମ ତ୍ୟଜନ୍ସର୍ଵଂ ସ୍ଥାନାନି ଚାଧମାନି ଚ ॥ ୧୭୫॥
ଜପଂ ହୀନାସନଂ କୁର୍ଵନ୍ହୀନକର୍ମଫଲପ୍ରଦମ୍ ।
ଗୁରୁଗୀତାଂ ପ୍ରୟାଣେ ଵା ସଙ୍ଗ୍ରାମେ ରିପୁସଙ୍କଟେ ॥ ୧୭୬॥
ଜପଞ୍ଜୟମଵାପ୍ନୋତି ମରଣେ ମୁକ୍ତିଦାୟକମ୍ ।
ସର୍ଵକର୍ମ ଚ ସର୍ଵତ୍ର ଗୁରୁପୁତ୍ରସ୍ୟ ସିଦ୍ଧ୍ୟତି ॥ ୧୭୭॥
ଇଦଂ ରହସ୍ୟଂ ନୋ ଵାଚ୍ୟଂ ତଵାଗ୍ରେ କଥିତଂ ମୟା ।
ସୁଗୋପ୍ୟଂ ଚ ପ୍ରୟତ୍ନେନ ମମ ତ୍ଵଂ ଚ ପ୍ରିୟା ତ୍ଵିତି ॥ ୧୭୮॥
ସ୍ଵାମି ମୁଖ୍ୟଗଣେଶାଦି ଵିଷ୍ଣ୍ଵାଦୀନାଂ ଚ ପାର୍ଵତି ।
ମନସାପି ନ ଵକ୍ତଵ୍ୟଂ ସତ୍ୟଂ ସତ୍ୟଂ ଵଦାମ୍ୟହମ୍ ॥ ୧୭୯॥
ଅତୀଵପକ୍ଵଚିତ୍ତାୟ ଶ୍ରଦ୍ଧାଭକ୍ତିୟୁତାୟ ଚ ।
ପ୍ରଵକ୍ତଵ୍ୟମିଦଂ ଦେଵି ମମାତ୍ମାଽସି ସଦା ପ୍ରିୟେ ॥ ୧୮୦॥
ଅଭକ୍ତେ ଵଞ୍ଚକେ ଧୂର୍ତେ ପାଖଣ୍ଡେ ନାସ୍ତିକେ ନରେ ।
ମନସାପି ନ ଵକ୍ତଵ୍ୟା ଗୁରୁଗୀତା କଦାଚନ ॥ ୧୮୧॥
ସଂସାରସାଗରସମୁଦ୍ଧରଣୈକମନ୍ତ୍ରଂ
ବ୍ରହ୍ମାଦିଦେଵମୁନିପୂଜିତସିଦ୍ଧମନ୍ତ୍ରମ୍ ॥
ଦାରିଦ୍ର୍ୟଦୁଃଖଭଵରୋଗଵିନାଶମନ୍ତ୍ରଂ
ଵନ୍ଦେ ମହାଭୟହରଂ ଗୁରୁରାଜମନ୍ତ୍ରମ୍ ॥ ୧୮୨॥
॥ ଇତି ଶ୍ରୀସ୍କଂଦପୁରାଣେ ଉତ୍ତରଖଂଡେ ଈଶ୍ଵରପାର୍ଵତୀ ସଂଵାଦେ ଗୁରୁଗୀତା ସମାପ୍ତ ॥
https://gita-swadhyaya.blogspot.com/2024/01/Gita-Swadhyaya.html
Comments
Post a Comment