ଶ୍ରୁତିଗୀତା

July 24, 2024

ଶ୍ରୁତିଗୀତା

ଶ୍ରୁତୟଃ ଊଚୁଃ ।
ଜୟ ଜୟ ଜହ୍ୟଜାମଜିତ ଦୋଷଗୃଭୀତଗୁଣାଂ ତ୍ୱମସି ଯଦାତ୍ମନା ସମବରୁଦ୍ଧସମସ୍ତଭଗଃ ।
ଅଗଜଗଦୋକସାମଖିଲଶକ୍ତ୍ୟବବୋଧକ ତେ କ୍ୱଚିଦଜୟାଽଽତ୍ମନା ଚ ଚରତୋଽନୁଚରେନ୍ନିଗମଃ ॥ ୧୪॥

ବୃହଦୁପଲବ୍ଧମେତଦବୟନ୍ତ୍ୟବଶେଷତୟା ଯତ ଉଦୟାସ୍ତମୟୌ ବିକୃତେର୍ମୃଦି ବାଽବିକୃତାତ୍ ।
ଅତ ଋଷୟୋ ଦଧୁସ୍ତ୍ୱୟି ମନୋବଚନାଚରିତଂ କଥମୟଥା ଭବନ୍ତି ଭୁବି ଦତ୍ତପଦାନି ନୃଣାମ୍ ॥ ୧୫॥

ଇତି ତବ ସୂରୟସ୍ତ୍ର୍ୟଧିପତେଽଖିଲଲୋକମଲକ୍ଷଣପଣକଥାମୃତାବ୍ଧିମବଗାହ୍ୟ ତପାଂସି ଜହୁଃ ।
କିମୁତ ପୁନଃ ସ୍ୱଧାମବିଧୁତାଶୟକାଲଗୁଣାଃ ପରମ ଭଜନ୍ତି ଯେ ପଦମଜସ୍ରସୁଖାନୁଭବମ୍ ॥ ୧୬॥

ଦୃତୟ ଇବ ଶ୍ୱସନ୍ତ୍ୟସୁଭୃତୋ ଯଦି ତେଽନୁବିଧା ମହଦମାୟୋଽଣ୍ଡମସୃଜନ୍ୟଦନୁଗ୍ରହତଃ ।
ପୁରୁଷବିଧୋଽନ୍ୱୟୋଽତ୍ର ଚରମୋଽନ୍ନମୟାଦିଷୁ ଯଃ ସଦସତଃ ପରଂ ତ୍ୱମଥ ଯଦେଷ୍ୱବଶେଷମୃତମ୍ ॥ ୧୭॥

ଉଦରମୁପାସତେ ଯ ଋଷିବର୍ତ୍ମସୁ କୂର୍ପଦୃଶଃ ପରିସରପଦ୍ଧତିଂ ହୃଦୟମାରୁଣୟୋ ଦହରମ୍ ।
ତତ ଉଦଗାଦନନ୍ତ ତବ ଧାମ ଶିରଃ ପରମଂ ପୁନରିହ ଯତ୍ସମେତ୍ୟ ନ ପତନ୍ତି କୃତାନ୍ତମୁଖେ ॥ ୧୮॥

ସ୍ୱକୃତବିଚିତ୍ରୟୋନିଷୁ ବିଶନ୍ନିବ ହେତୁତୟା ତରତମତଶ୍ଚକାସ୍ସ୍ୟନଲବତ୍ସ୍ୱକୃତାନୁକୃତିଃ ।
ଅଥ ବିତଥାସ୍ୱମୂଷ୍ୱବିତଥଂ ତବ ଧାମ ସମଂ ବିରଜଧିୟୋଽନ୍ୱୟନ୍ତ୍ୟଭିବିପଣ୍ୟବ ଏକରସମ୍ ॥ ୧୯॥

ସ୍ୱକୃତପୁରେଷ୍ୱମିଷ୍ୱବହିରନ୍ତରସମ୍ବରଣଂ ତବ ପୁରୁଷଂ ବଦନ୍ତ୍ୟଖିଲଶକ୍ତିଧୃତୋଂଽଶକୃତମ୍ ।
ଇତି ନୃଗତିଂ ବିବିଚ୍ୟ କବୟୋ ନିଗମାପବନଂ ଭବତ ଉପାସତେଽଙ୍ଘ୍ରିମଭବଂ ଭୁବି ବିଶ୍ୱସିତାଃ ॥ ୨୦॥

ଦୁରବଗମାତ୍ମତତ୍ତ୍ୱନିଗମାୟ ତବାତ୍ତତନୋଶ୍ଚରିତମହାମୃତାବ୍ଧିପରିବର୍ତପରିଶ୍ରମଣାଃ ।
ନ ପରିଲଷନ୍ତି କେଚିଦପବର୍ଗମପୀଶ୍ୱର ତେ ଚରଣସରୋଜହଂସକୁଲସଙ୍ଗବିସୃଷ୍ଟଗୃହାଃ ॥ ୨୧॥

ତ୍ୱଦନୁପଥଂ କୁଲାୟମିଦମାତ୍ମସୁହୃତ୍ପ୍ରିୟବଚ୍ଚରତି ତଥୋନ୍ମୁଖେ ତ୍ୱୟି ହିତେ ପ୍ରିୟ ଆତ୍ମନି ଚ ।
ନ ବତ ରମନ୍ତ୍ୟହୋ ଅସଦୁପାସନୟାଽଽତ୍ମହନୋ ଯଦନୁଶୟା ଭ୍ରମନ୍ତ୍ୟୁରୁଭୟେ କୁଶରୀରଭୃତଃ ॥ ୨୨॥

ନିଭୃତମରୁନ୍ମନୋକ୍ଷଦୃଢୟୋଗୟୁଜୋ ହୃଦି ଯନ୍ମୁନୟ ଉପାସତେ ତଦରୟୋଽପି ଯୟୁଃ ସ୍ମରଣାତ୍ ।
ସ୍ତ୍ରିୟ ଉରଗେନ୍ଦ୍ରଭୋଗଭୁଜଦଣ୍ଡବିଷକ୍ତଧିୟୋ ବୟମପି ତେ ସମାଂ ସମଦୃଧୋଽଙ୍ଘ୍ରିସରୋଜସୁଧାଃ ॥ ୨୩॥

କ ଇହ ନୁ ବେଦ ବତବରଜନ୍ମଲୟୋଽଗ୍ରସରଂ ଯତ ଉଦଗାଦୃଷିର୍ୟମନୁ ଦେବଗଣା ଉଭୟେ ।
ତର୍ହି ନ ସନ୍ନ ଚାସଦୁଭୟଂ ନ ଚ କାଲଜବଃ କିମପି ନ ତତ୍ର ଶାସ୍ତ୍ରମବକୃଷ୍ୟ ଶୟୀତ ଯଦା ॥ ୨୪॥

ଜନିମସତଃ ସତୋ ମୃତିମୁତାତ୍ମନି ଯେ ବେଦ ଚ ଭିଦାଂ ବିପଣମୃତଂ ସ୍ମରନ୍ତ୍ୟୁପଦିଶନ୍ତି ତ ଆରୁପତୈଃ ।
ତ୍ରିଗୁଣମୟଃ ପୁମାନିତି ଭିଦା ଯଦବୋଧକୃତା ତ୍ୱୟି ନ ତତଃ ପରତ୍ର ସ ଭବେଦବବୋଧରସେ ॥ ୨୫॥

ସଦିବ ମନସ୍ତ୍ରିବୃତ୍ତ୍ୱୟି ବିଭାତ୍ୟସଦାମନୁଜାତ୍ସଦଭିମୃଶନ୍ତ୍ୟଶେଷମିଦମାତ୍ମତ୍ୟାଽଽତ୍ମବିଦଃ ।
ନ ହି ବିକୃତିଂ ତ୍ୟଜନ୍ତି କନକସ୍ୟ ତଦାତ୍ମତୟା ସ୍ୱକୃତମନୁପ୍ରବିଷ୍ଟମିଦମାତ୍ମତୟାଽବସିତମ୍ ॥ ୨୬॥

ତବ ପରି ଯେ ଚରନ୍ତ୍ୟଖିଲସତ୍ତ୍ୱନିକେତତୟା ତ ଉତ ପଦାଽଽକ୍ରମନ୍ତ୍ୟବିଗଣୟ୍ୟ ଶିରୋ ନିରୃତେଃ ।
ପରିବୟସେ ପଶୂନିବ ଗିରା ବିବୁଧାନପି ତାଂସ୍ତ୍ୱୟି କୃତସୌହୃଦାଃ ଖଲୁ ପୁନନ୍ତି ନ ଯେ ବିମୁଖାଃ ॥ ୨୭॥

ତ୍ୱମକରଣଃ ସ୍ୱରାଡଖିଲକାରକଶକ୍ତିଧରସ୍ତବ ବଲିମୁଦ୍ୱହନ୍ତି ସମଦନ୍ତ୍ୟଜୟାଽନିମିଷାଃ ।
ବର୍ଷଭୁଜୋଽଖିଲକ୍ଷିତିପତେରିବ ବିଶ୍ୱସୃଜୋ ବିଦଧତି ଯତ୍ର ଯେ ତ୍ୱଦଧିକୃତା ଭବତଶ୍ଚକିତାଃ ॥ ୨୮॥

ସ୍ଥିରଚରଜାତୟଃ ସ୍ୟୁରଜୟୋଥନିମିତ୍ତୟୁଜୋ ବିହର ଉଦୀକ୍ଷୟା ଯଦି ପରସ୍ୟ ବିମୁକ୍ତ ତତଃ ।
ନ ହି ପରମସ୍ୟ କଶ୍ଚିଦପରୋ ନ ପରଶ୍ଚ ଭବେଦ୍ୱିୟତ ଇବାପଦସ୍ୟ ତବ ଶୂନ୍ୟତୁଲାଂ ଦଧତଃ ॥ ୨୯॥

ଅପରମିତା ଧ୍ରୁବାସ୍ତନୁଭୃତୋ ଯଦି ସର୍ୱଗତାସ୍ତର୍ହି ନ ଶାସ୍ୟତେତି ନିୟମୋ ଧ୍ରୁବ ନେତରଥା ।
ଅଜନି ଚ ଯନ୍ମୟଂ ତଦ୍ୱିମୁଚ୍ୟ ନିୟନ୍ତୃ ଭବେତ୍ସମମନୁଜାନତାଂ ଯଦମତଂ ମତଦୃଷ୍ଟତୟା ॥ ୩୦॥

ନ ଘଟତ ଉଦ୍ଭବଃ ପ୍ରକୃତିପୂରୁଷୟୋର୍ଜୟୋରୁଭୟଯୁଜା ଭବନ୍ତ୍ୟସୁଭୃତୋ ଜଲବୁଦ୍ବୁଦବତ୍ ।
ତ୍ୱୟି ତ ଇମେ ତତୋ ବିବିଧନାମଗୁଣୈଃ ପରମେ ସରିତ ଇବାର୍ଣବେ ମଧୁନି ଲିଲ୍ୟୁରୁଶେଷରସାଃ ॥ ୩୧॥

ନୃଷୁ ତବ ମାୟଯା ଭ୍ରମମମୀଷ୍ୱବଗତ୍ୟ ଭୃଶଂ ତ୍ୱୟି ସୁଧିୟୋଽଭବେ ଦଧତି ଭାବମନୁପ୍ରଭବମ୍ ।
କଥମନୁବର୍ତତାଂ ଭବଭୟଂ ତବ ଯଦ୍ଭ୍ରୁକୁଟିଃ ସୃଜତି ମୁହୁସ୍ତ୍ରିଣେମିରଭବଚ୍ଛରଣେଷୁ ଭୟମ୍ ॥ ୩୨॥

ବିଜିତହୃଷୀକବାୟୁଭିରଦାନ୍ତମନସ୍ତୁରଗଂ ଯ ଇହ ଯତନ୍ତି ଯନ୍ତୁମତିଲୋଲମୁପାୟଖିଦଃ ।
ବ୍ୟସନଶତାନ୍ୱିତାଃ ସମବହାୟ ଗୁରୋଶ୍ଚରଣଂ ବଣିଜ ଇବାଜ ସନ୍ତ୍ୟକୃତକର୍ଣଧରା ଜଲଧୌ ॥ ୩୩॥

ସ୍ୱଜନସୁତାତ୍ମଦାରଧନଧାମଧରାସୁରଥୈସ୍ତ୍ୱୟି ସତି କିଂ ନୃଣାଂ ଶ୍ରୟତ ଆତ୍ମନି ସର୍ୱରସେ ।
ଇତି ସଦଜାନତାଂ ମିଥୁନତୋ ରତୟେ ଚରତାଂ ସୁଖୟତି କୋ ନ୍ୱିହ ସ୍ୱବିହତେ ସ୍ୱନିରସ୍ତଭଗେ ॥ ୩୪॥

ଭୁବି ପୁରୁପୁଣ୍ୟତୀର୍ଥସଦନାନ୍ୟୃଷୟୋ ବିମଦାସ୍ତ ଉତ ଭବତ୍ପଦାମ୍ବୁଜହୃଦୋଽଘଭିଦଙ୍ଘ୍ରିଜଲାଃ ।
ଦଧତି ସୁକୃନ୍ମନସ୍ତ୍ୱୟି ଯ ଆତ୍ମନି ନିତ୍ୟସୁଖେ ନ ପୁନରୁପାସତେ ପୁରୁଷସାରହରାବସଥାନ୍ ॥ ୩୫॥

ସତ ଇଦମୁତ୍ଥିତଂ ସଦିତି ଚେନ୍ନନୁ ତର୍କହତଂ ବ୍ୟଭିଚରତି କ୍ୱ ଚ କ୍ୱ ଚ ମୃଷା ନ ତଥୋଭୟଯୁକ୍ ।
ବ୍ୟବହୃତୟେ ବିକଲ୍ପ ଇଷିତୋଽନ୍ଧପରମ୍ପରୟା ଭ୍ରମୟତି ଭାରତି ତ ଉରୁବୃତ୍ତିଭିରୁକ୍ଥଜଡାନ୍ ॥ ୩୬॥

ନ ଯଦିଦମଗ୍ର ଆସ ନ ଭବିଷ୍ୟଦତୋ ନିଧନାଦନୁମିତମନ୍ତରା ତ୍ୱୟି ବିଭାତି ମୃଷୈକରସେ ।
ଅତ ଉପମୀୟତେ ଦ୍ରବିଣଜାତିବିକଲ୍ପପଥୈର୍ୱିତଥମନୋବିଲାସମୃତମିତ୍ୟବୟନ୍ତ୍ୟବୁଧାଃ ॥ ୩୭॥

ସ ଯଦଜୟା ତ୍ୱଜାମନୁଶୟିତ ଗୁଣାଂଶ୍ଚ ଜୁଷନ୍ଭଜତି ସ୍ୱରୂପତାଂ ତଦନୁ ମୃତ୍ୟୁମପେତଭଗଃ ।
ତ୍ୱମୁତ ଜହାସି ତାମହିରିବ ତ୍ୱଚମାତ୍ତଭଗୋ ମହସି ମହୀୟସେଽଷ୍ଟଗୁଣିତେଽପରିମେୟଭଗ।ଃ ॥ ୩୮॥

ଯଦି ନ ସମୁଦ୍ଧରନ୍ତି ଯତୟୋ ହୃଦି କାମଜଟା ଦୁରଧିଗମୋଽସତାଂ ହୃଦି ଗତୋଽସ୍ମୃତକଣ୍ଠମଣିଃ ।
ଅସୁତୃପୟୋଗିନାମୁଭୟତୋଽପ୍ୟସୁଖଂ ଭଗବନ୍ନନପଗତାନ୍ତକାଦନଧିରୂଢପଦାଦ୍ଭବତଃ ॥ ୩୯॥

ତ୍ୱଦବଗମୀ ନ ବେତ୍ତି ଭବଦୁତ୍ଥଶୁଭୟୋର୍ଗୁଣବିଗୁଣାନ୍ୱୟାଂସ୍ତର୍ହି ଦେହଭୃତାଂ ଚ ଗିରଃ ।
ଅନୁୟୁଗମନ୍ୱହଂ ସଗୁଣ ଗୀତପରମ୍ପରୟା ଶ୍ରବଣଭୃତୋ ଯତସ୍ତ୍ୱମପବର୍ଗଗତିର୍ମନୁଜୈଃ ॥ ୪୦॥

ଦ୍ୟୁପତୟ ଏବ ତେ ନ ଯୟୁରନ୍ତମନନ୍ତତୟା ତ୍ୱମପି ଯଦନ୍ତାଽଣ୍ଡନିଚୟା ନନୁ ସାବରଣାଃ ।
ଖ ଇବ ରଜାଂସି ବାନ୍ତି ବୟସା ସହ ଯଚ୍ଛ୍ରୁତୟସ୍ତ୍ୱୟି ହି ଫଲନ୍ତ୍ୟତାନ୍ନିରସନେନ ଭବନ୍ନିଧନାଃ ॥ ୪୧॥