ଶ୍ରୀସରସ୍ୱତୀଗୀତା
ଶ୍ରୀସରସ୍ୱତୀଗୀତା
॥ ଅଥ ସରସ୍ୱତୀଗୀତା ॥
ମାର୍କଣ୍ଡେୟ ଉବାଚ -
ଅତ୍ରୈବ ଚ ସରସ୍ୱତ୍ୟା ଗୀତଂ ପରପୁରଞ୍ଜୟ ।
ପୃଷ୍ଟା ଯା ମୁନିନା ବୀର ଶୃଣୁ ତାର୍କ୍ଷ୍ୟେଣ ଧୀମତା ॥ ୧॥
ତାର୍କ୍ଷ୍ୟ ଉବାଚ -
କିନୁ ଶ୍ରେୟଃ ପୁରୁଷସ୍ୟେହ ଭଦ୍ରେ କଥଂ କୁର୍ୱନ୍ନ ଚ୍ୟବତେ ସ୍ୱଧର୍ମାତ୍ ।
ଆଚକ୍ଷ୍ୱ ମେ ଚାରୁସର୍ୱାଙ୍ଗି କୁର୍ୟାତ୍ୱୟାଶିଷ୍ଟୋ ନ ଚ୍ୟବେୟଂ ସ୍ୱଧର୍ମାତ୍ ॥ ୨॥
କଥଂ ବାଗ୍ନିଂ ଜୁହୁୟାଂ ପୂଜୟେ ବା କସ୍ମିନ୍କାଲେ କେନ ଧର୍ମୋ ନ ନଶ୍ୟେତ୍ ।
ଏତତ୍ସର୍ୱ ସୁଭଗେ ପ୍ରବ୍ରବୀହି ଯଥା ଲୋକାନ୍ ବିରଜାଃ ସଞ୍ଚରେୟମ୍ ॥ ୩॥
ମାର୍କଣ୍ଡେୟ ଉବାଚ -
ଏବଂ ପୃଷ୍ଟା ପ୍ରୀତିୟୁକ୍ତେନ ତେନ ଶୁଶ୍ରୂମୀକ୍ଷ୍ୟୋତ୍ତମବୁଦ୍ଧିୟୁକ୍ତମ୍ ।
ତାର୍କ୍ଷ୍ୟଂ ବିପ୍ରଂ ଧର୍ମୟୁକ୍ତଂ ହିତଂ ଚ ସରସ୍ୱତୀ ବାକ୍ୟମିଦଂ ବଭାଷେ ॥ ୪॥
ସରସ୍ୱତ୍ୟୁବାଚ -
ଯୋ ବ୍ରହ୍ମ ଜାନାତି ଯଥାପ୍ରଦେଶଂ ସ୍ୱାଧ୍ୟାୟନିତ୍ୟଃ ସୁଚିରପ୍ରମତ୍ତଃ ।
ସ ବୈ ପାରଂ ଦେବଲୋକସ୍ୟ ଗନ୍ତା ସହାମରୈଃ ପ୍ରାପ୍ନୁୟାତ୍ପ୍ରୀତିୟୋଗମ୍ ॥ ୫॥
ତତ୍ର ସ୍ମ ରମ୍ୟାବିପୁଲା ବିଶୋକାଃ ସୁପୁଷ୍ପିତାଃ ପୁଷ୍କରିଣ୍ୟଃ ସୁପୁଣ୍ୟାଃ ।
ଅକର୍ଦମାମୀନବତ୍ୟଃ ସୁତୀର୍ଥା ହିରଣ୍ମୟୈରାବୃତାଃ ପୁଣ୍ଡରୀକୈଃ ॥ ୬॥
ତାସାଂ ତୀରେଷ୍ୱାସତେ ପୁଣ୍ୟଭାଜୋ ମହୀୟମାନାଃ ପୃଥଗପ୍ସରୋଭିଃ ।
ସୁପୁଣ୍ୟଗନ୍ଧାଭିରଲଙ୍କୃତାଭିର୍ହିରଣ୍ୟବର୍ଣାଭିରତୀବ ଦୃଷ୍ଟାଃ ॥ ୭॥
ପରଂ ଲୋକଂ ଗୋପ୍ରଦାସ୍ତ୍ୱାପ୍ନୁବନ୍ତି ଦତ୍ୱାନଡୁହଂ ସୂର୍ୟଲୋକଂ ବ୍ରଜନ୍ତି ।
ବାସୋ ଦତ୍ୱା ଚାନ୍ଦ୍ରମସଂ ତୁ ଲୋକଂ ଦତ୍ୱା ହିରଣ୍ୟମମରତ୍ୱମେତି ॥ ୮॥
ଧେନୁଂ ଦତ୍ୱା ସୁପ୍ରଭାଂ ସୁପ୍ରଦୋହାଂ କଲ୍ୟାଣବତ୍ସାମପଲାୟିନୀଂ ଚ ।
ଯାବନ୍ତି ରୋମାଣି ଭବନ୍ତି ତସ୍ୟାସ୍ତାବଦ୍ୱର୍ଷାଣ୍ୟାସତେ ଦେବଲୋକେ ॥ ୯॥
ଅନଡ୍ୱାହଂ ସୁବ୍ରତଂ ଯୋ ଦଦାତି ହଲସ୍ୟ ବୋଢାରମନନ୍ତବୀର୍ୟମ୍ ।
ଧୁରନ୍ଧରଂ ବଲବନ୍ତଂ ଯୁଦ୍ମନଂ ପ୍ରାପ୍ନୋତି ଲୋକାନ୍ଦଶଧେନୁଦସ୍ୟ ॥ ୧୦॥
ଦଦାତି ଯୋ ବୈ କପିଲାଂ ସଚୈଲାଂ କାଂସ୍ୟୋପଦୋହାଂ ଦ୍ରବିଣୈରୁତ୍ତରୀୟୈ ।
ତୈସ୍ତୈର୍ଗୁଣୈଃ କାମଦୁହାଥ ଭୂତ୍ୱା ନରଂ ପ୍ରଦାତାରମୁପୈତି ସା ଗୌଃ ॥ ୧୧॥
ଯାବନ୍ତି ରୋମାଣି ଭବନ୍ତି ଧେନ୍ୱାସ୍ତାବତ୍ଫଲଂ ଭବତି ଗୋପ୍ରଦାନେ ।
ପୁତ୍ରାଂଶ୍ଚ ପୌତ୍ରାଂଶ୍ଚ କୁଲଂ ଚ ସର୍ୱମାସପ୍ତମଂ ତାରୟତେ ପରତ୍ର ॥ ୧୨॥
ସଦକ୍ଷିଣାଂ କାଞ୍ଚନଚାରୁଶୃଙ୍ଗୀଂ କାଂସ୍ୟୋପଦୋହାଂ ଦ୍ରବିଣୈରୁତ୍ତରୀୟୈଃ ।
ଧେନୁଂ ତିଲାନାଂ ଦଦତୋ ଦ୍ୱିଜାୟ ଲୋକା ବସୂନାଂ ସୁଲଭା ଭବନ୍ତି ॥ ୧୩॥
ସ୍ୱକର୍ମଭିର୍ଦାନବସଂନିରୁଦ୍ଧେ ତୀବ୍ରାନ୍ଧକାରେ ନରକେ ପତନ୍ତମ୍ ।
ମହାର୍ଣବେ ନୌରିବ ବାତୟୁକ୍ତା ଦାନଂ ଗବାଂ ତାରୟତେ ପରତ୍ର ॥ ୧୪॥
ଯୋ ବ୍ରାହ୍ମଦେୟାଂ ତୁ ଦଦାତି କନ୍ୟାଂ ଭୂମିପ୍ରଦାନଂ ଚ କରୋତି ବିପ୍ରେ ।
ଦଦାତି ଦାନଂ ବିଧିନା ଚ ଯଶ୍ଚ ସ ଲୋକମାପ୍ନୋତି ପୁରନ୍ଦରସ୍ୟ ॥ ୧୫॥
ଯଃ ସପ୍ତବର୍ଷାଣି ଜୁହୋତି ତାର୍କ୍ଷ୍ୟ ହବ୍ୟଂ ତ୍ୱଗ୍ନୌ ନିୟତଃ ସାଧୁଶୀଲ ।
ସପ୍ତାବରାନ୍ସପ୍ତପୂର୍ୱାନ୍ପୁନାତି ପିତାମହାନାତ୍ମନା କର୍ମଭିଃ ସ୍ୱୈଃ ॥ ୧୬॥
ତାର୍କ୍ଷ୍ୟ ଉବାଚ -
କିମଗ୍ନିହୋତ୍ରସ୍ୟ ବ୍ରତଂ ପୁରାଣମାଚକ୍ଷ୍ୱ ମେ ପୃଚ୍ଛତଶ୍ଚାନୁରୂପେ ।
ତ୍ୱୟାନୁଶିଷ୍ଟୋହମିହାଦ୍ୟ ବିଦ୍ୟାଂ ଯଦଗ୍ନିହୋତ୍ରସ୍ୟ ବ୍ରତଂ ପୁରାଣମ୍ ॥ ୧୭॥
ସରସ୍ୱତୀ ଉବାଚ -
ନ ବାଶୁଚିର୍ନାପ୍ୟନିର୍ଣିକ୍ୟ ପାଣିର୍ନାବ୍ରହ୍ମବିଜ୍ଜୁହୁୟାନ୍ନାବିପଶ୍ଚିତ୍ ।
ବୁଭୁତ୍ସବଃ ଶୁଚିକାମା ହି ଦେବା ନାଶ୍ରଦ୍ଦଧାନାଦ୍ଧିହବିର୍ଜୁହନ୍ତି ॥ ୧୮॥
ନାଶ୍ରୋତ୍ରିୟଂ ଦେବହବ୍ୟେ ନିୟୁଞ୍ଜ୍ୟାନ୍ମୋଘଂ ପୁରା ସିଞ୍ଚତି ତାଦୃଶୋ ହି ।
ଅପୂର୍ୱମଶ୍ରୋତ୍ରିୟମାହ ତାର୍କ୍ଷ୍ୟ ନ ବୈ ତାଦୃଗ୍ଜୁହୁୟାଦଗ୍ନିହୋତ୍ରମ୍ ॥ ୧୯॥
କୃଶାଶ୍ଚ ଯେ ଜୁହ୍ୱତି ଶ୍ରଦ୍ଦଧାନାଃ ସତ୍ୟବ୍ରତା ହୁତଶିଷ୍ଟାଶିନଶ୍ଚ ।
ଗବାଂ ଲୋକଂ ପ୍ରାପ୍ୟ ତେ ପୁଣ୍ୟଗନ୍ଧଂ ପଶ୍ୟନ୍ତି ଦେବଂ ପରମଂ ଚାପି ସତ୍ୟମ୍ ॥ ୨୦॥
ତାର୍କ୍ଷ୍ୟ ଉବାଚ -
କ୍ଷେତ୍ରଜ୍ଞଭୂତାଂ ପରଲୋକଭାବେ କର୍ମୋଦୟେ ବୁଦ୍ଧିମତି ପ୍ରବିଷ୍ଟାମ୍ ।
ପ୍ରଜ୍ଞାଂ ଚ ଦେବୀଂ ସୁଭଗେ ବିମୃଶ୍ୟ ପୃଚ୍ଛାମି ତ୍ୱାଂ କାହ୍ୟସି ଚାରୁରୂପେ ॥ ୨୧॥
ସରସ୍ୱତ୍ୟୁବାଚ -
ଅଗ୍ନିହୋତ୍ରାଦହମଭ୍ୟାଗତାସ୍ମି ବିସର୍ପମାଣା ସଂଶୟଚ୍ଛେଦନାୟ ।
ତ୍ୱତ୍ସନ୍ନିୟୋଗାଦହମେତଦବ୍ରୁବଂ ଭାବେ ସ୍ଥିତା ତଥ୍ୟମର୍ଥଂ ଯଥାବତ୍ ॥ ୨୨॥
ତାର୍କ୍ଷ୍ୟ ଉବାଚ -
ନ ହି ତ୍ୱୟା ସଦୃଶୀ କାଚିଦସ୍ତି ବିଭ୍ରାଜସେ ହ୍ୟତିମାତ୍ରଂ ଯଥା ଶ୍ରୀଃ ।
ରୂପଂ ଚ ତେ ଦିବ୍ୟମନନ୍ତକାନ୍ତି ପ୍ରଜ୍ଞାଂ ଚ ଦେବୀଂ ସୁଭଗେ ବିଭର୍ଷି ॥ ୨୩॥
ସରସ୍ୱତ୍ୟୁବାଚ -
ଶ୍ରେଷ୍ଠାନି ଯାନି ଦ୍ୱିପଦାଂ ବରିଷ୍ଠ ଯଜ୍ଞେଷୁ ବିଦ୍ୱନ୍ନୁପପାଦୟନ୍ତି ।
ତୈରେବ ଚାହଂ ସମ୍ପ୍ରବୃଦ୍ଧା ଭବାମି ଚାପ୍ୟାୟିତା ରୂପବତୀ ଚ ବିପ୍ର ॥ ୨୪॥
ଯଚ୍ଚାପି ଦ୍ରବ୍ୟମୁପୟୁଜ୍ୟତେହ ବାନସ୍ପତ୍ୟମାୟସମ୍ପାର୍ଥିବଂ ବା ।
ଦିବ୍ୟେନ ରୂପେଣ ଚ ପ୍ରଜ୍ଞୟା ଚ ତବୈବ ସିଦ୍ଧିରିତି ବିଦ୍ଧି ବିଦ୍ୱନ୍ ॥ ୨୫॥
ତାର୍କ୍ଷ୍ୟ ଉବାଚ -
ଇଦଂ ଶ୍ରେୟଃ ପରମଂ ମନ୍ୟମାନା ବ୍ୟାପୃଚ୍ଛନ୍ତେ ମୁନୟଃ ସମ୍ପ୍ରତୀତାଃ ।
ଆଚକ୍ଷ୍ୱ ମେ ତଂ ପରମଂ ବିଶୋକଂ ମୋକ୍ଷଂ ପରଂ ଯଂ ପ୍ରବିଶନ୍ତି ଧୀରାଃ ।
ସାଙ୍ଖ୍ୟଂ ଯୋଗାଃ ପରମଂ ଯଂ ବିଦନ୍ତି ପରଂ ପୁରାଣଂ ତମହଂ ନ ବେଦ୍ମି ॥ ୨୬॥
ସରସ୍ୱତ୍ୟୁବାଚ -
ତଂ ବୈ ପରଂ ବେଦବିଦଃ ପ୍ରପନ୍ନାଃ ପରଂ ପରେଭ୍ୟଃ ପ୍ରଥିତଂ ପୁରାଣମ୍ ।
ସ୍ୱାଧ୍ୟାୟବନ୍ତୋ ବ୍ରତପୁଣ୍ୟଯୋଗୈସ୍ତପୋଧନା ବୀତଶୋକା ବିମୁକ୍ତାଃ ॥ ୨୭॥
ତସ୍ୟାଥ ମଧ୍ୟେ ଚେତସଃ ପୁଣ୍ୟଗନ୍ଧାଃ ସହସ୍ର ଶାଖା ବିପୁଲା ବିଭାନ୍ତି ।
ତସ୍ୟ ମୂଲାତ୍ସରିତଃ ପ୍ରସ୍ରବନ୍ତି ମଧୂଦକପ୍ରସ୍ରବଣାଃ ସୁପୁଣ୍ୟାଃ ॥ ୨୮॥
ଶାଖାଂ ଶାଖାଂ ମହାନଦ୍ୟଃ ସଂୟାନ୍ତି ସିକତାଶୟାଃ ।
ଧାନାଃ ପୂପା ମାଂସଶାକା ସଦା ପାୟସକର୍ଦମାଃ ॥ ୨୯॥
ଯସ୍ମିନ୍ନଗ୍ନିମୁଖା ଦେବାଃ ସେନ୍ଦ୍ରାଃ ସହମରୁଦ୍ଗଣାଃ ।
ଈଜିରେ କ୍ରତୁଭିଃ ଶ୍ରେଷ୍ଠୈସ୍ତତ୍ପଦଂ ପରମଂ ମମ ॥ ୩୦॥
ଇତି ସରସ୍ୱତୀଗୀତା ସମାପ୍ତା॥
ଶ୍ରୀମଦ୍ଭଗବଦ୍ଗୀତା
https://gita-swadhyaya.blogspot.com/2024/01/ShrimadvhagavadGITA.html
शात्विक आहार वनाना सिखे
https://khadya-peya.blogspot.com/2024/10/KP0001.html
Comments
Post a Comment